Hvað eru margar mörgæsir á Suðurskautslandinu?

Nafn þitt

Netfang þitt

Netfang móttakanda

Ruslpóstvörn =

Svar

Hvað eru margar mörgæsir á Suðurskautslandinu?
Fimm tegundir mörgæsa verpa á Suðurskautslandinu. Rannsókn sem gerð var árið 2020 á ástandi mörgæsastofna þar leiddi í ljós að samtals töldust varppör þessara fimm tegunda vera 5,77 milljón það árið.

Flestar mörgæsir á Suðurskautslandinu tilheyra tegund aðalsmörgæsa (Pygoscelis adeliae, e. Adélie penguin), alls fjórar milljónir para eða 69% allra mörgæsa á Suðurskautslandinu. Næst algengasta tegundin er hettumörgæsin (Pygoscelis antarctica, e. chinstrap penguin) með tæplega 1,4 milljónir para. Keisaramörgæsin (Aptenodytes forsterii, e. emperor penguin) telur rúmlega 238.000 pör, tæplega 123.000 pör tilheyra papúamörgæsinni (Pygoscelis papua, e. gentoo penguin ) og pör klettamörgæsarinnar (Eudyptes chrysolophus, e. macaroni penguin) eru um 13.250.

Það vekur ugg hjá vísindamönnum að mörgæsum á Suðurskautslandinu fækkaði umtalsvert milli talninga sem gerðar voru á varptíma þeirra árin 2019 og 2020. Alls var fækkunin um 6,7% eða um rúmlega 415 þúsund pör. Mest var fækkunin hjá aðalsmörgæsinni þar sem varppörum fækkaði um rúm 200 þúsund eða 5%. Hlutfallslega var fækkunin þó mest hjá keisaramörgæsinni eða rúmlega 15%.

Heimild og mynd:

• Oceanites. State of Antarctic penguins 2020.
• Penguins in the Antarctic | Antarctica Bound | Flickr. Birt undir Creative Commons Attribution-NoDerivs 2.0 Generic leyfi. (Sótt 20.04.2021).

...