Hvað er „að prumpa í stampinn“ og hvaðan kemur orðasambandið?

Nafn þitt

Netfang þitt

Netfang móttakanda

Ruslpóstvörn =

Svar

Hvað er „að prumpa í stampinn“ og hvaðan kemur orðasambandið?
Eftir því sem vitað er tengist orðasambandið að prumpa í stampinn Norðurlandi, einkum Akureyri. Það er í raun merkingarlítið. Allir þekkja sögnina að prumpa ‘leysa vind’ og nafnorðið stamp um kringlóttan bala. Sunnlendingar gerðu og gera ef til vill enn gys að norðlensku málfari, einkum rödduðum framburði. Á Tímarit.is er dæmi um sambandið í tímaritinu Monitor í apríl 2011. Nokkrir aðfluttir nemendur voru spurðir um lífið í Háskólanum á Akureyri. Ein spurningin var: „Hvort er betra að prumpa í stampinn eða drekka kók í bauk?“

Ég hygg að ég hafi fyrst heyrt „prumpa í stampinn“ fyrir um sex áratugum en væntanlega er það eldra. Þá var vanalega sagt „stúlkan bað piltinn að prumpa í stampinn“, l-in og m-in voru höfð rödduð. Það var ekki kórrétt því að l-in í piltur og stúlka áttu ekki bæði að vera rödduð, aðeins í stúlka, en mikið var hlegið. Yngra er að drekka kók úr bauk sem Reykvíkingum, og sjálfsagt öðrum líka, þótti og þykir ef til vill enn, mjög fyndið.

Heimild og mynd:

• timarit.is
• Mynd: Sarpur: Menningarsögulegt gagnasafn. Mynd í eigu Minjasafns Austurlands og birt með góðfúslegu leyfi safnsins. (Sótt 19.4.2021).

...