Hvaða kram er átt við þegar eitthvað fellur ekki í kramið?

Nafn þitt

Netfang þitt

Netfang móttakanda

Ruslpóstvörn =

Svar

Hvaða kram er átt við þegar eitthvað fellur ekki í kramið?
Hvorugkynsorðið kram er notað um (óþarfa)varning, verðlausa vöru og þekkist að minnsta kosti frá því seint á 16. öld. Samkvæmt ritmálssafni Orðabókar Háskólans þekkist orðasambandið að eitthvað falli (ekki) í kramið hjá einhverjum frá síðari hluta 18. aldar:

Þetta þénar nú allt í yðar kram, minn elskulegi.

Algengastar eru sagnirnar að falla og passa í kramið. Orðasambandið merkir að einhverjum líki (ekki) eitthvað, eitthvað fær (ekki) hljómgrunn hjá einhverjum, eitthvað þykir (ekki) við hæfi. Það er oftast notað neikvætt.

Kram er notað í dönsku, norsku og sænsku og er tekið að láni úr miðlágþýsku þar sem það var notað um þakdúk og varningsbúð með slíku þaki. Í þýsku er vel þekkt orðasambandið das paßt ihm nicht in den Kram ‘þetta hentar honum ekki, hann æskir þessa ekki’ (Krüger-Lorenzen 164).

Heimildir og mynd:

• Kurt Krüger-Lorenzen. 1988. Deutsche Redensarten und was dahinter steckt. 5. útgáfa. Düsseldort og Wien.
• Ritmálssafn Orðabókar Háskólans. Stofnun Árna Magnússonar í íslenskum fræðum. http://ritmalssafn.arnastofnun.is
• Mynd: Kæstur Hákarl | (Icelandic for "fermented shark") It is a Gr… | Flickr. Höfundur myndar: Audrey. Birt undir Creative Commons Attribution 2.0 Generic leyfi. (Sótt 5.3.2021).

Upprunalega spurningin var:

Að falla í kramið. Hvað þýðir kram í þessu sambandi?

...