Hver er tilgangurinn með yfirtökuskyldu?

Nafn þitt

Netfang þitt

Netfang móttakanda

Ruslpóstvörn =

Svar

Hver er tilgangurinn með yfirtökuskyldu?
Öll spurningin hljóðaði svona:

Hver er tilgangurinn með yfirtökuskyldu, sbr. nýlega frétt um aukinn eignarhlut Samherja í Eimskip?

Kveðið er á um yfirtökuskyldu í X. kafla laga um verðbréfaviðskipti (nr. 108/2007) á Íslandi og sambærileg ákvæði eru í lögum nágrannalandanna. Þetta er hluti af þeirri vernd sem minnihluti hluthafa í hlutafélögum sem eru með hlutabréf sín skráð í kauphöll nýtur.

Hugmyndin er einföld, ef einn aðili nær því að eignast nógu hátt hlutfall hlutabréfa til að geta í reynd stjórnað félaginu þá getur það sett aðra hluthafa í verri stöðu en áður. Það sama á við ef tveir eða fleiri tengdir aðilar ná yfirráðum. Miðað er við 30% atkvæða í lögunum eða að hafa með einhverjum hætti öðlast rétt til að velja meiri hluta félagsstjórnar.

Komi þessi staða upp eiga aðrir hluthafar erfitt með að hafa áhrif á stjórnun félagsins og þeir geta jafnvel átt erfitt með að koma í veg fyrir að stóri eigandinn reyni að stýra því þannig að það komi honum betur en öðrum hluthöfum, þótt reynt sé að setja skorður við því í lögum. Þess vegna er kveðið á um að sá sem eignast svo stóran hlut í skráðu félagi verði að bjóðast til að kaupa hlutafé annarra minni hluthafa. Hann verður því að leggja fram svokallað yfirtökutilboð. Allir verða að fá sama tilboð og verðið má ekki vera lægra en hæsta verð sem hann hefur greitt fyrir hluti síðustu sex mánuði áður en tilboðið var lagt fram.

Minni hluthafar þurfa ekki að taka tilboðinu frekar en þeir vilja en ef stóri hluthafinn eignast meira en 90% hlutafjár, til dæmis ef langflestir samþykkja tilboðið, þá geta þeir sem eftir sitja þurft að selja gegn vilja sínum. Í lögunum eru svo ýmis ákvæði um skyldur stjórnar þegar yfirtökutilboð er lagt fram, tilboð sem hugsanlega koma frá frá öðrum o.fl.

Mynd:

• DETTIFOS | Hoek van Holland 26-2-2019 | kees torn | Flickr. (Sótt 12.03.2020). Myndina tók kees torn og hún er birt undir leyfinu Creative Commons — Attribution-ShareAlike 2.0 Generic — CC BY-SA 2.0

...