Hafa skipstjórar og flugstjórar heimild til handtöku og valdbeitingar?

Nafn þitt

Netfang þitt

Netfang móttakanda

Ruslpóstvörn =

Svar

Hafa skipstjórar og flugstjórar heimild til handtöku og valdbeitingar?
Hvorki skipstjórar né flugmenn hafa heimildir til handtöku eða valdbeitingar, umfram það sem almennt gengur og gerist utan þeirra fara sem þeir stjórna.

Skipstjórar og flugmenn hafa þó rúmar valdheimildir um borð í förum þessum og hafa nokkurt vald yfir þeim sem ferðast með þeim. Í sjómannalögum kemur fram að skipstjórar hafi agavald á skipi og hafi heimild til að þröngva skipverjum til hlýðni með valdi ef slíkt telst nauðsynlegt til að halda góðri reglu á skipinu. Skipstjórum ber einnig að taka bráðabirgðaskýrslu og er heimilt að byrgja inni eða hefta á annan hátt skipverja sem grunaður er um að hafa drýgt meiri háttar glæp. Þessi valdbeiting skipstjóra má þó aldrei ganga lengra en atvik krefja hverju sinni og er einungis ætluð sem bráðabirgðaráðstöfun.

Svipaðar reglur gilda um flugstjóra sem er einnig heimilt, samkvæmt lögum um loftferðir nr. 60/1998, að „þröngva mönnum með valdi til hlýðni við sig“ ef slíkt telst nauðsynlegt til að halda uppi góðri hegðun og reglu í loftfari. Einnig er flugstjóra veitt heimild til að gera hluti upptæka innan loftfarsins og er heimilt að setja grunaða einstaklinga í gæslu uns þeir verða afhentir þeim yfirvöldum sem í hlut eiga.

Flugstjórum og skipstjórum eru veittar þessar valdheimildir enda fara þeir með æðsta vald innan þeirra farartækja sem þeir stjórna og bera því ábyrgð á að halda uppi lögum og reglu innan þeirra. Hefur Ísland undirgengist ýmsa alþjóðasáttmála sem kveða á um hlutverk flug- og skipstjóra líkt og Haagsáttmálinn, Tókíósamningurinn og Alþjóðasamningnum um öryggi mannslífa á hafinu (SOLAS) frá 1974.

Heimildir:

• Alþjóðasamningurinn um að koma í veg fyrir töku loftfara. (Sótt 18.11.19)
• Alþjóðasamningur varðandi lögbrot og aðra verknaði í loftförum. (Sótt 18.11.19)
• Greinargerð frumvarps til laga um loftferðir. (Sótt 18.11.19)
• Lög um loftferðir númer 60/1998. (Sótt 18.11.19)
• Sjómannalög númer 35/1985. (Sótt 18.11.19)

Mynd:

• File:Captain holding life preserver with two women peeking through on board steamer SS VICTORIA, off Nome, Alaska, between 1907 and (AL+CA 6385).jpg - Wikimedia Commons. (Sótt 3.12.2019).

...