Gæti rafsegulgeislun frá 5G farsímasendum hugsanlega skaðað lífverur?

Nafn þitt

Netfang þitt

Netfang móttakanda

Ruslpóstvörn =

Svar

Gæti rafsegulgeislun frá 5G farsímasendum hugsanlega skaðað lífverur?
5G er ný tækni í þráðlausum samskiptum sem reyndar er ekki fullkomlega búið að skilgreina þegar þetta svar er skrifað. Gengið er út frá því að spyrjandi sé að velta því fyrir sér hvort þessi nýja tækni sé hættulegri heilsu manna heldur en fyrri kynslóðir tækni til sömu nota. Hvað varðar rafsegulgeislunina, þá liggur munurinn á 5G og eldri kynslóðum einungis í tíðninni sem notuð er. Áætlað er að 5G farsímasendar muni senda á tíðni allt upp í 26 gígarið (GHz) en núverandi kynslóð farsímasenda notar 0,7-2,6 GHz tíðnisvið.

Áður hefur spurningunni Eru rafsegulbylgjur frá farsímum og öðrum raftækjum skaðlegar heilsunni eða erfðaefninu? verið svarað ágætlega af Viðari Guðmundssyni.

Þar er útskýrt hvernig rafsegulbylgjur flytja orkuskammta, en stærð orkuskammtanna er í hlutfalli við tíðni geislunarinnar. Orkuskammtar í rafsegulgeislun sem notuð er til þráðlausra samskipta eru mjög litlir, jafnvel þó tíðnin hækki með tilkomu 5G farsímasenda. Til samanburðar er tíðni útfjólublás ljóss mæld í petariðum (PHz), en eitt petarið er milljón gígarið.

Áhrif rafsegulgeislunar á lífverur fara einmitt eftir tíðninni og viðmiðunarmörk um mesta leyfilega styrk eru háð tíðni geislunarinnar. Ekki hefur verið sýnt fram á skaðleg áhrif af geislun rafsegulsviða þegar styrkur þeirra er undir viðmiðunarmörkum. Munurinn á 5G og eldri kynslóðum sömu tækni er eiginlega enginn hvað varðar líffræðileg áhrif.

Hæg er að lesa meira um rafsegulsvið og farsímageislun á vef Geislavarna ríkisins.

Heimildir:

• Alþjóðaráð um geislavarnir vegna ójónandi geislunar (ICNIRP), álit.
• Innleiðing 5G getur orðið mjög hröð, Morgunblaðið 29. nóvember 2018.
• https://spectrummonitoring.com/frequencies/.

Mynd:

• Pixabay. (Sótt 11.2.2019).

Upprunalega spurningin var:

Gætu 5G örbylgjur hugsanlega skaðað lífverur?

...