Hvaða rannsóknir hefur Guðný S. Guðbjörnsdóttir stundað?

Nafn þitt

Netfang þitt

Netfang móttakanda

Ruslpóstvörn =

Svar

Hvaða rannsóknir hefur Guðný S. Guðbjörnsdóttir stundað?
Guðný S. Guðbjörnsdóttir er prófessor í uppeldis- og menntunarfræði við Menntavísindasvið Háskóla Íslands. Rannsóknir hennar hafa einkum beinst að vitrænum þroska barna og ungmenna; menningarlæsi ungs fólks; menntastjórnun og forystu; og menntun, kynjajafnrétti, kennaramenntun og skólastarfi. Hún hefur skrifað fjölda tímaritsgreina í íslensk og erlend tímarit og eina bók. Rannsóknir Guðnýjar hafa verið styrktar af Vísindasjóði, Rannsóknasjóði Háskóla Íslands og Rannsóknarráði Ítalíu.

Viðfangsefni doktorsritgerðar Guðnýjar var vitsmunaþroski barna og unglinga. Doktorsritgerðin byggir á langtímarannsókn á vitrænum þroska 7 ára barna sem var fylgt eftir til 15 ára aldurs. Rannsóknin var hluti af svokallaðri Þroskarannsókn sem var samstarfsverkefni Háskóla Íslands og Max-Planck um menntarannsóknir í Berlín.

Menningarlæsi, með áherslu á áhuga, þekkingu og skilning ungs fólks á íslenskri menningu var viðfangsefni Guðnýjar í samstarfi við ítalskan fræðimann og íslenskan doktorsnema um árabil. Hlutar rannsóknarinnar beindust að nýbúum á Íslandi og að menningarlæsi á tímum samfélagsmiðla.

Rannsóknir Guðnýjar á menntastjórnun og forystu hafa beinst að stjórnun menntastofnana í ljósi kynjafræðilegra kenninga og orðræðunni um árangur, stjórnun og kynferði, þar sem upplifun kvenstjórnenda af nýfrjálshyggju í menntakerfinu er skoðuð og kynjun leiðtogahugtaksins. Þá tók Guðný þátt í rannsókn á áhrifum efnahagshrunsins á skólastarf í þremur sveitarfélögum ásamt samstarfsfólki á Menntavísindasviði.

Síðasti flokkur rannsókna Guðnýjar menntun, kynjajafnrétti, kennaramenntun og skólastarf, endurspegla kynjafræðilegar athuganir á ýmsum sviðum menntunar, námsbókum og námskrám svo og sjálfsmyndum ungs fólks. Megináherslan síðustu árin hefur verið á að rannsaka kennaramenntun á Menntavísindasviði HÍ í ljósi kynjajafnréttismála, og jafnréttisviðhorf skólastjórnenda í leik-, grunn-, og framhaldsskólum.

Guðný stóð að stofnum Rannsóknarstofu í kvennafræðum árið 1991 (nú RIKK) og RannKyn, Rannsóknarstofu um jafnrétti, kyngervi og menntun á Menntavísindasviði HÍ árið 2010.

Guðný fæddist í Reykjavík árið 1949. Hún lauk BA-prófi í sálfræði frá Vassar-háskóla í New York 1971, MSc í sálfræði frá Háskólanum í Manchester 1974 og doktorsprófi í menntunarfræðum frá Háskólanum í Leeds 1987. Guðný varð lektor í uppeldisfræði við Háskóla Íslands árið 1975. Hún starfaði lengst af í Félagsvísindadeild, varð dósent árið 1987 og prófessor árið 2000. Frá árinu 2009 hefur Guðný verið prófessor á Menntavísindasviði Háskóla Íslands. Guðný var alþingismaður Reykvíkinga fyrir Kvennalistann 1995-1999.

Mynd:

• Úr safni GG.

...