Hvaða rannsóknir hefur Kristín Norðdahl stundað?

Nafn þitt

Netfang þitt

Netfang móttakanda

Ruslpóstvörn =

Svar

Hvaða rannsóknir hefur Kristín Norðdahl stundað?
Kristín Norðdahl er dósent í náttúrufræðimenntun við deild faggreinakennslu á Menntavísindasviði Háskóla Íslands. Rannsóknir hennar hafa beinst að hugmyndum leikskólabarna um náttúruna og hvernig má bregðast við þeim í skólastarfi, möguleikum upplýsingatækni í leikskólastarfi, umhverfismennt og sjálfbærnimenntun í leik- og grunnskólum ásamt hlutverki útiumhverfis í námi leik- og grunnskólabarna. Nýjasta rannsóknarviðfangsefni hennar snýr að notkun grunnskólanemenda á myndmiðlun í líffræðinámi og mögulegum áhrifum þess á nám þeirra.

Doktorsritgerð Kristínar fjallar um hlutverk útiumhverfis í íslenskum leik- og grunnskólum. Þar var athugað hvernig stefnumótendur, kennarar og börn sáu hlutverkið fyrir sér og hvernig það kom fram í starfi leikskólakennara og yngri barna kennara í grunnskóla.

Kristín hefur tekið þátt í ýmsum rannsóknar- og þróunarverkefnum hér á landi svo sem um útikennslu og náttúrufræðimenntun í leik- og grunnskóla, umhverfismennt í leikskóla og sjálfbærnimenntun í leik- og grunnskóla. Kristín hefur einnig tekið þátt í samnorrænum verkefnum um nám og kennslu sem eru styrkt af Nordplus. Eitt af þessum verkefnum var um náttúrufræðinám leikskólabarna, Natgrep, þar sem unnið var að viðmiðum um hvað skipti máli í slíku námi. Einnig hefur Kristín um árabil tekið þátt í tveimur öðrum samnorrænum verkefnum sem lúta að kennaramenntun. Þessi verkefni felast í þróun samnorrænna námskeiða fyrir kennaranema annars vegar um borgaravitund, fjölmenningu og sjálfbærni í Spica-verkefninu og hins vegar um náttúrufræðimenntun í Álku-verkefninu. Nýjasta norræna verkefnið sem Kristín tekur þátt í er um sjálfbærnimenntun leikskólabarna þar sem leitað er leiða til að ýta undir þann þátt í menntun ungra barna.

Kristín er fædd 1956. Hún lauk Fil. cand.-prófi í líffræði frá Háskólanum í Lundi í Svíþjóð, kennslufræði til kennsluréttinda og síðan meistaraprófi í menntunarfræði frá Háskóla Íslands og varði doktorsritgerð sína í menntunarfræði frá Háskóla Íslands 2015. Kristín hefur kennt við Grunnskólann í Borgarnesi, Laugalækjarskóla í Reykjavík, Menntaskólann í Reykjavík, Fósturskóla Íslands, Kennaraháskóla Íslands og frá 2008 við Menntavísindasvið Háskóla Íslands.

Mynd:

• Úr safni KN.

...