Hvað hefur vísindamaðurinn Sigurður Freyr Hafstein rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Sigurður Freyr Hafstein rannsakað?
Sigurður Freyr Hafstein er prófessor í stærðfræði við Raunvísindadeild Háskóla Íslands. Hann hefur stundað ýmsar rannsóknir á ferlinum, meðal annars hermun jarðskjálfta, rauntímahermun umferðar og bestun staðsetninga mælistöðva á járnbrautarteinum, en hans helsta áhugasvið er eigindleg hegðun hreyfikerfa, stöðugleiki þeirra og hönnun algríma til þess að fást við slík verkefni.

Hreyfikerfi er kerfi þar sem ástand kerfisins er fall af tíma. Þess háttar kerfi eru áhugaverð stærðfræðilega séð, en skilningur á slíkur kerfum er einnig mjög hagnýtur því flestar vísinda- og verkfræðigreinar fást við tímaháð kerfi á einn eða annan hátt. Sem dæmi um hreyfikerfi má nefna sólkerfið, hagkerfi Íslands, rafmagnsmótor, þorskstofninn eða gervitungl á braut um jörðu. Merkileg niðurstaða um hreyfikerfi, svo merkileg að sumir vilja kalla hana Höfuðsetningu hreyfikerfafræðanna, er að eigindlegri hegðun hvers kerfis er lýst með svokölluðu fullkomnu Lyapunov-falli fyrir kerfið. Fullkomið Lyapunov-fall fyrir hreyfikerfi er raungilt fall frá ástandsrúmi kerfisins með þann eiginleika að það er stranglega minnkandi eftir öllum lausnarferlum kerfisins. Slíkt fall kóðar hegðun kerfisins og ef það er þekkt fyrir tiltekið kerfi, þá gefur það tæmandi lýsingu á aðdráttarmengjum kerfisins og stigullíka flæðinu. Vandamálið er að mjög erfitt er að búa slíkt fall til fyrir gefið kerfi.

Rannsóknir Sigurðar og samstarfsmanna hans hafa miðað að því að smíða algrím sem reikna slík fullkomin Lyapunov-föll fyrir ólínuleg kerfi. Hann er meðhöfundur yfir 70 vísindagreina í alþjóðlegum ritrýndum vísindatímaritum, ráðstefnuritum og bókaköflum og hefur stýrt þremur rannsóknaverkefnum styrktum af Rannsóknasjóði Rannís.

Sigurður fæddist árið 1973, lauk stúdentsprófi frá Menntaskólanum í Reykjavík 1993, dipl.-math. gráðu frá Gerhard-Mercator-háskólanum í Duisburg Þýskalandi árið 1998 og dr.rer.nat. gráðu frá Háskóla Duisburg-Essen í Þýskalandi árið 2002. Hann starfaði sem nýdoktor við eðlisfræðideild Háskóla Duisburg-Essen 2001-2006 og sem lektor/dósent/prófessor við Tækni- og verkfræðideild Háskólans í Reykjavík 2006-2016. Árið 2017 hóf hann störf sem prófessor við Háskóla Íslands. Sigurður hefur verið formaður Íslenska Stærðfræðafélagsins síðan 2015.

Mynd:

• Úr safni SFH.

...