Hvaða rannsóknir hefur Gyða Margrét Pétursdóttir stundað?

Nafn þitt

Netfang þitt

Netfang móttakanda

Ruslpóstvörn =

Svar

Hvaða rannsóknir hefur Gyða Margrét Pétursdóttir stundað?
Gyða Margrét Pétursdóttir er dósent í kynjafræði við Háskóla Íslands. Hún er þeirrar skoðunar að hið persónulega sé afsprengi þess samfélags sem við lifum og hrærumst í og sé því bæði pólitískt og fræðilegt viðfangsefni.

Gyða hefur í rannsóknum sínum leitað svara við persónulegum viðfangsefnum sem eru þá jafnframt samfélagslegs og fræðilegs eðlis. Hún gerði ásamt Elínu Sigurðardóttur rannsókn á viðhorfum framhaldsskólanema til brúðkaupa og hjónabands og gekk í kjölfarið í hjónaband hjá sýslumanni. Hún skoðaði hugmyndir feðra og vinnuveitenda þeirra til fæðingarorlofs og samræmingar fjölskyldulífs og atvinnu, sem og hugmyndir maka feðranna til sömu viðfangsefna. Í kjölfarið átti hún sitt annað barn.

Í doktorsverkefni sínu hélt hún áfram á sömu braut, rannsakaði vinnumenningu, kynjatengsl og fjölskylduábyrgð og eignaðist sitt þriðja barn. Innan áru kynjajafnréttis er yfirskrift doktorsverkefnisins sem lýsir því hvernig karlar og konur sannfæra sig um að jafnrétti ríki þrátt fyrir að raunin sé önnur. Þess háttar bil milli þess sem er og orðræðunnar hafa verið Gyðu hugleikin. Hún var á árunum 2014-2017 aðstoðarverkefnisstjóri fyrir Íslands hönd í ESB-verkefninu Garcia. Í verkefninu var reynsla og upplifun akademískra starfsmanna Háskóla Íslands af vinnuumhverfi sínu kortlögð með ýmsum hætti og þar kemur aftur við sögu bilið milli þess sem er og orðræðunnar. Gyða hefur einnig stundað rannsóknir á kynbundnu ofbeldi, málefni sem er henni afar hugleikið.

Gyða Margrét Pétursdóttir er fædd árið 1973. Hún var fyrst manna til að ljúka doktorsprófi í kynjafræði frá Háskóla Íslands árið 2009 þaðan sem hún lauk einnig MA- og BA-prófi í félagsfræði. Gyða var ráðin aðjúnkt við stjórnmálafræðideild Háskóla Íslands árið 2010 og lektor árið 2013. Í grunnskóla var hún spurð: Hvað ætlar þú að verða væna? Svar Gyðu: „Blaðamaður á DV af því að það er frjálst og óháð dagblað.“ Gyða var með svarinu að leitast við að ná utan um löngun sína til að fjalla um tvískinnung og ranglæti sem hún varð áskynja í samfélaginu. Í rannsóknum sínum og kennslu nýtur Gyða þess nú að kortleggja kynjakerfið með öllum sínum kynjaða tvískinnungi og starfar því við það sem hún ætlaði sér þótt hún ætti ekki orð yfir það á sínum tíma.

Mynd:

• Háskóli Íslands - Gyða Margrét Pétursdóttir dósent. (Sótt 9.8.2018).

...