Hvað merkir seil sem stundum kemur fyrir í örnefnum?

Nafn þitt

Netfang þitt

Netfang móttakanda

Ruslpóstvörn =

Svar

Hvað merkir seil sem stundum kemur fyrir í örnefnum?
Í heild hljóðaði spurningin svona:

Heil og sæl . Hvað er seil? Sem heit á stað á jörð eða örnefni? T.d. Miklavatnsseil eða -seilar, Hreiðurseil, Fremri- og Heimri-Hnúkaseil, Mógrafarseil. Veit Vísindavefurinn það?

Nafnið Seil er rangur ritháttur fyrir Seyl en orðið seyl merkir ‚vætusvæði í mýri‘, eða ‚foræði, kelda‘. Það er skylt orðinu søyl í nýnorsku sem merkir ‚forarpyttur‘ og søle í dönsku sem merkir ‚for, bleyta‘. Bæjarnafnið Seyla í Skagafirði er náskylt þessu orði og sömu merkingar. Orðið seil merkir hins vegar ‚band, taug‘ og á ekkert skylt við seyl en þessi tvö orð hafa fallið saman í framburði þegar y og i féllu saman við afkringingu yfsilons, líklega á 16. öld.

Í örnefnalýsingum í Stofnun Árna Magnússonar sem að mestu voru skrifaðar á síðustu öld er nafnmyndin Seil algengari en Seyl. Þó má nefna að í örnefnalýsingu Jaðars í Hrunamannahreppi, Árnessýslu er nefnt örnefnið Seyl um mýrarblett, og í lýsingu Brekku á Ingjaldssandi, Vestur-Ísafjarðarsýslu er Seyl nafn á mýri. Nafnið og nafnliðinn sem um er spurt ætti því að skrifa Seyl (-seyl) að réttu lagi.

Mynd:

• Úr safni Votlendissjóðs.

...