Hvernig er álpappír búinn til?

Nafn þitt

Netfang þitt

Netfang móttakanda

Ruslpóstvörn =

Svar

Hvernig er álpappír búinn til?

Margir hafa eflaust tekið eftir því að önnur hlið álpappírs er mött en hin gljáandi. Skýringin á þessu felst í því hvernig álpappír er búinn til.

Framleiðsla álpappírs hefst með vinnslu á risastórum álklumpi sem getur vegið meira en 20 tonn. Algengt er að klumpurinn sé 6 m á lengd, 1,8 m á breidd og 60 cm á þykkt. Fyrst er þunnt lag skafið utan af álklumpnum til að slétta yfirborðið og fjarlægja óhreinindi. Hann er þvínæst hitaður upp að 525°C og pressaður milli tveggja stálvalsa (stálkefla, e. steel rollers) en hitinn mýkir álið svo auðveldara er að pressa það. Við pressunina myndast mikill hiti og er hætta á að álið festist við heitu valsana og því þarf að kæla þá með blöndu af 95% vatni og 5% olíu. Kælivökvinn er síaður og endurnýttur í frekari kælingu. Álklumpnum er rennt nokkrum sinnum í gegnum sömu stálvalsana og bilið milli þeirra er minnkað í hvert sinn svo klumpurinn fletjist út.

Þegar ákveðinni þykkt er náð er álplötunni vanalega rennt í gegnum nokkra stálvalsa í röð þar sem raufin milli valsanna fer sífellt minnkandi. Álplatan er þannig heitpressuð þar til hún er orðin nógu þunn til að hægt sé að rúlla henni upp á kefli. Yfirleitt er þykkt plötunnar á þessu stigi minni en 12 mm. Þvermál álrúllunnar getur verið allt að 2,3 m.

Á þessu stigi eða síðar í ferlinu er álið oftast hitað og kælt til að endurkristalla það. Þetta er gert til að minnka spennu álsins og auka sveigjanleika þess. Næst er álrúllan færð yfir í frekari pressun milli tveggja kaldari stálvalsa. Þetta er í raun sams konar ferli og í heitpressuninni nema álið er við herbergishita þegar það er kemur að völsunum. Pressunin veldur því að álið hitnar upp undir 80°C. Álplatan er þannig pressuð milli tveggja valsa eða röð af völsum með minnkandi rauf.

Í seinustu skrefunum er álfilman orðin afar þunn og hætta er á að hún rifni vegna spennunnar sem pressuninni fylgir, þess vegna er brugðið á það ráð að renna tveimur lögum af álfilmu saman í gegnum valsana. Í þessu ferli snúa tvær hliðar álfilmanna að fínpússuðum völsum og verða þær sléttar vegna slétts yfirborðs valsanna; þessar hliðar fá gljáandi yfirborð.

Hinar hliðar álfilmanna snúa saman og verða aðeins grófari fyrir vikið; þær fá matta áferð. Þegar réttri þykkt hefur verið náð, oft um 0,05 mm og allt niður í 0,025 mm, er sneytt af endum álfilmunnar til að jafna þá og koma í veg fyrir að álfilman rifni. Að endingu er rúllan með álfilmunni skorin í viðeigandi breidd og álfilmunni pakkað til neytenda.

Myndband sem sýnir hvernig álpappír er framleiddur. Hér er byrjað með 7,5 tonna álklump sem er 4,4 m á lengd, 1,4 m á breidd og 45 cm á þykkt. Úr verður álpappír sem er 12,7 km á lengd.

Myndir:

• Aleris Expands Aerospace Aluminum Sphere To China | AWIN content from Aviation Week. (Sótt 9.4.2018).
• Aluminum Rolling Mills. (Sótt 9.4.2018).

Spurningu Kristínar, Eiðs og Stefáns er hér svarað að hluta.

...