Hvað hefur vísindamaðurinn Margrét Þorsteinsdóttir rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Margrét Þorsteinsdóttir rannsakað?
Margrét Þorsteinsdóttir er dósent í lyfjagreiningu við Lyfjafræðideild Háskóla Íslands. Hún hefur tekið þátt í fjölmörgum rannsóknaverkefnum á sviði efnagreininga á lífvísum, umbrotsefnum og fituefnum með háhraða vökvagreini tengdum tvöföldum massagreini.

Margrét hefur lagt mikla áherslu á uppbyggingu á klínískri massagreiningu í samvinnu við rannsókna- og háskólastofnanir innanlands og erlendis. Áhersla Margrétar er að þróa sérhæfðar massagreiningaaðferðir til að bæta sjúkdómsgreiningu og lyfjameðferð sjúklinga. Meðal verkefna er þróun á greiningaaðferð á sjaldgæfum erfðasjúkdómi, adenínfosfóríbósýltransferasaskorti, sem leiðir oft til langvinns nýrnasjúkdóms og jafnvel lokastigs nýrnabilunar.

Undanfarin ár hefur Margrét, ásamt vísindamönnum í Háskóla Íslands, unnið að rannsóknarverkefni tengdu fituefnaskiptum krabbameinsfrumna. Margrét hefur þróað aðferðafræði til að skima eftir lípíðum og rannsaka áhrif lífeðlisfræðilegra breyta á myndun þeirra. Þær rannsóknir tengjast sameiningu á sérhæfðu massagreiningakerfi og fjölþátta efnatölfræði til að greina mynstur lípíða í krabbameinsfrumum, brjóstakrabbameinsvef og í blóðvökva. Leitast er eftir að finna sameindir í blóðvökva sem segja til um upphaf sjúkdóms sem nýta má í greiningapróf og er líklegt til að gagnast ungum konum í mikilli ættlægri áhættu fyrir brjóstakrabbameini.

Á síðustu árum hefur Margrét unnið að þróun á aðferðum til að auðkenna virk efni úr sjávarfangi, cyanobakteríum og plöntum. Má þar nefna þróun á massagreiningaraðferðum til að auðkenna efni í cyanobakteríum með virkni gegn offitu.

Margrét hefur undanfarin ár tekið þátt í tveimur verkefnum sem styrkt eru af Evrópusambandinu, verkefninu BluePharmTrain sem var styrkt af 7. rammaáætluninni og verkefninu MossTech sem styrkt er af Horizon2020. Hún hefur tekið virkan þátt í félagsstörfum í tengslum við uppbyggingu vísinda á Íslandi. Var formaður Efnafræðifélags Íslands frá 2009-2012 og formaður fagráðs Heilbrigðisvísindasviðs Háskóla Íslands frá 2014-2017.

Margrét fæddist í Reykjavík árið 1962 og lauk stúdentsprófi frá Menntaskólanum við Sund árið 1983. Hún brautskráðist með MSc í lyfjafræði frá Uppsalaháskóla í Svíþjóð árið 1989 og doktorspróf í lyfjagreiningu frá sama Háskóla árið 1998. Hún vann sem sérfræðingur við fyrirtækið Scotia LipidTeknik í Stokkhólmi, jafnframt því að vera stundakennari við Lyfjafræðideild Uppsalaháskóla frá 1989-1999. Margrét sneri heim til starfa árið 1999. Hún vann fyrst sem sérfræðingur hjá Delta og síðan sem framkvæmdarstjóri lyfjagreiningadeildar hjá Encode. Árið 2006 setti hún upp lyfjagreiningadeild hjá Íslenskri Erfðagreiningu og starfaði þar sem yfirmaður til 2009. Hún hefur starfað sem dósent hjá Lyfjafræðideild frá 2009 og stofnaði sprotafyrirtækið ArcticMass sama ár.

Mynd:

• © Kristinn Ingvarsson.

...