Hvað hefur vísindamaðurinn Sigrún Helga Lund rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Sigrún Helga Lund rannsakað?
Sigrún Helga Lund er dósent í líftölfræði við læknadeild Háskóla Íslands og tölfræðingur hjá Íslenskri erfðagreiningu. Rannsóknir Sigrúnar miða fyrst og fremst að því að nota upplýsingar úr lýðgrunduðum gagnasöfnum til að skilja eðli og umfang sjúkdóma og annarra heilsutengdra viðfangsefna.

Hér á landi eru skráð mörg vönduð gagnasöfn, má þar nefna Krabbameinsskrá, Lyfjagagnagrunn, sjúkraskrá Landspítala og erfða- og ættarupplýsingar Íslenskrar erfðagreiningar sem eru einstakar á heimsvísu. Með úrvinnslu á ópersónugreinanlegum upplýsingum úr slíkum gagnasöfnum má afla dýrmætrar læknisfræðilegrar þekkingar. Með slíku móti hefur Sigrún stundað hagnýttar tölfræðirannsóknir á nær öllum sviðum læknisfræði og er meðhöfundur yfir 50 alþjóðlegra ritrýndra vísindagreina.

Sigrún hefur einnig átt í góðu samstarfi við íslensk nýsköpunarfyrirtæki í lyfjaþróun og heilsutengdu áhættumati. Hjá Oculis, Lipid og Kerecis rannsakaði hún lyfjaferjur, hægðarlyf og sárameðferðir en hjá Risk rannsakaði hún áhættureikna fyrir sjónkvilla hjá sykursjúkum.

Að auki hefur Sigrún unnið að kennsluþróun á háskólastigi. Hún hóf kennsluferil sinn sem stundakennari við Háskóla Íslands haustið 2001 og hefur síðan kennt við fjögur af fimm sviðum Háskóla Íslands, í Menntaskólanum við Hamrahlíð, í Opna Háskólanum auk þess sem hún hefur haldið námskeið fyrir bráðger börn. Hún er meðhöfundur að tveimur kennslubókum í tölfræði á háskólastigi, Tölfræði frá grunni og R frá grunni. Hún leggur áherslu á vendikennslu og fjölbreytt námsmat og er annar stofnanda Kennslubankans.

Sigrún Helga fæddist árið 1982 og lauk stúdentsprófi frá Menntaskólanum við Hamrahlíð árið 2000. Hún lauk BS-prófi í stærðfræði frá Háskóla Íslands árið 2004 og hlaut kennsluréttindi í framhaldsskólum vorið 2007. Hún lauk doktorsgráðu í tölfræði frá Háskóla Íslands vorið 2014, með viðkomu í Konunglega tækniháskólanum í Stokkhólmi. Doktorsritgerð hennar fjallaði um tölfræðilega tilraunahögun á örflögum.

Mynd:

• © Kristinn Ingvarsson.

...