Hvað hefur vísindamaðurinn Steinunn Kristjánsdóttir rannsakað?

Nafn þitt

Netfang þitt

Netfang móttakanda

Ruslpóstvörn =

Svar

Hvað hefur vísindamaðurinn Steinunn Kristjánsdóttir rannsakað?
Steinunn Kristjánsdóttir er prófessor í fornleifafræði við Sagnfræði- og heimspekideild Háskóla Íslands. Helstu rannsóknasvið hennar eru miðaldafornleifafræði, norræn fornleifafræði, kirkjusaga, klausturfornleifafræði, kynjafornleifafræði, þróun húsagerða og miðlun vísindalegrar þekkingar.

Steinunn stjórnaði fornleifarannsóknum á miðaldaklaustrinu að Skriðu í Fljótsdal yfir 10 ára tímabil, frá 2002-2012 og var það ein viðamesta fornleifarannsókn sem ráðist hefur verið í á Íslandi. Á daginn kom að Skriðuklaustur var ekki aðeins aðsetur munka með helgihaldi og heitum bænum, heldur einnig skjól hinna sjúku og dauðvona. Samtals voru grafnar upp tæplega 300 beinagrindur í kirkjugarði Skriðuklausturs og var um helmingur þeirra bein sjúklinga. Bók um rannsóknina, Sagan af klaustrinu á Skriðu, kom út árið 2012 og hlaut hún Fjöruverðlaunin í flokki fræðibóka það ár, auk þess að vera tilnefnd til Íslensku bókmenntaverðlaunanna og Viðurkenningar Hagþenkis.

Sumarið 2013 hófst vinna við nýja fornleifarannsókn sem miðar að því að skrá minjar klaustranna sem rekin voru á Íslandi á kaþólskum tíma (1000-1550). Lauk Steinunn þessari rannsókn árið 2017 með útgáfu bókarinnar Leitin að klaustrunum – klausturhald á Íslandi í fimm aldir. Bókin var valin besta fræðibókin af Félagi bóksala árið 2017 og hlaut tilnefningu til Íslensku bókmenntaverðlaunanna og Fjöruverðlaunanna.

Steinunn Kristjánsdóttir er fædd árið 1965. Hún lauk stúdentsprófi frá Menntaskólanum á Ísafirði árið 1986. Hún stundaði háskólanám við Gautaborgarháskóla og lauk þaðan BA-prófi 1993, MA-prófi 1994 og doktorsprófi í fornleifafræði árið 2004. Doktorsritgerð hennar, The Awakening of Christianity in Iceland, byggði á rannsókninni Mörk heiðni og kristni sem Steinunn stýrði á árunum 1997 til 2000, en markmiðið með því verkefni var að rannsaka uppruna og útbreiðslu kristni á Íslandi frá landnámi til 1200. Steinunn tók við sameiginlegri stöðu lektors í fornleifafræði við Þjóðminjasafn Íslands og Háskóla Íslands árið 2006. Hún hefur verið prófessor frá 2012.

Mynd:

• Úr safni SK.

...