Hverjir eru helstu hjartagallarnir sem börn greinast með?

Nafn þitt

Netfang þitt

Netfang móttakanda

Ruslpóstvörn =

Svar

Hverjir eru helstu hjartagallarnir sem börn greinast með?
Það eru margir hjartagallar sem börn greinast með en á Íslandi eru það þrír sem eru algengastir:

• Op á milli gátta (e. atrial septal defect, skammstafað ASD).
• Op milli slegla (e. ventricular septal defect, skammstafað VSD).
• Opin fósturæð (e. patent ductus arterio, skammstafað PDA).

Op á milli gátta

Stundum fæðast börn með op á milli gátta. Oft eru opin það lítil að þau hafa engin áhrif á hvernig hjartað vinnur. Þegar hjartað vex lokast götin af sjálfu sér. Þegar götin eru stór hleypa þau meira blóði á milli gáttanna og getur það haft alvarlegar afleiðingar. Eins eru minni líkur á að þau lokist af sjálfu sér. Ef opinu er ekki lokað getur það leitt til skemmda á hjarta og lungum. Oftast er slíkt gert í skurðaðgerð en í sumum tilfellum er hægt að loka þeim í hjartaþræðingu. Op á milli gátta er með algengustu hjartagöllunum sem börn á Íslandi fæðast með.

Op milli slegla

Þegar stór göt eru á milli neðri hólfa, sleglanna, erfiðar hjartað of mikið og blóðþrýstingur eykst hægra megin í hjarta og lungum vegna aukins blóðflæðis. Þetta aukna álag getur leitt til hjartaáfalls og hefur óæskileg áhrif á vöxt hjartans. Gatinu er lokað með opinni hjartaaðgerð. Sé það ekki gert getur þessi mikli þrýstingur í lungunum skaðað æðakerfið þar og leitt til háþrýsings í lungum (e. pulmonary arterial hypertension).

Opin fósturæð

Á meðan fóstur er í móðurkviði hefur það ekki þörf fyrir lungu þar sem það fær allt sitt súrefni frá móðurinni og hleypir fósturæðin blóðinu fram hjá lungunum. Eftir fæðingu lokast fósturæðin venjulega af sjálfu sér á nokkrum klukkustundum eða nokkrum dögum. Stundum gerist það ekki og þá þarf að loka henni með aðgerð eða lyfjum.

Svar þetta byggir á fræðsluefni hjartagáttarinnar á vef Neistans, styrktarfélags hjartveikra bara og er birt með leyfi þeirra.

Heimildir og mynd:

• http://hjartagattin.neistinn.is/index.php (Sótt 06.11.2015)
• Nýgengi og greining meðfæddra hjartagalla á Íslandi 1990-1999 | Fræðigreinar | 04. tbl. 88. árg. 2002 (Sótt 06.11.2015)

...