Hvar er best að grafa eftir gulli?

Nafn þitt

Netfang þitt

Netfang móttakanda

Ruslpóstvörn =

Svar

Hvar er best að grafa eftir gulli?
Gull (Au) er frumefni. Eins og á við um önnur frumefni þyngri en járn, verður það aðeins til í miklum hamförum sprengistjarna. Um tilurð gulls og annarra frumefna er hægt að lesa meira í fróðlegu svari eftir Ottó Elíasson við spurningunni Hver eru algengustu frumefni alheimsins og hve mörg atóm eru í honum öllum?

Meðalstyrkur gulls í jarðskorpunni er um 0,005 grömm í hverju tonni af grjóti. Til þess að það svari kostnaði að vinna gull er talið að lágmarksstyrkur þess þurfi að vera um 1000 sinnum meiri eða 5 g í hverju tonni.

Vegna jarðfræðilegra ferla getur orðið þúsundföld auðgun gulls í bergi. Þetta gerist til dæmis í fellingafjöllum. Í svari Sigurðar Steinþórssonar við spurningunni Af hverju finnst ekki gull í jörðu á Íslandi, er landið of ungt? er fjallað um þetta ferli og þar segir meðal annars:

Þetta öfluga jarðhitakerfi leysir gull og önnur efni úr berginu og fellir út aftur á kaldari stöðum. Með tímanum rofna fjallgarðarnir niður en gullið situr eftir - þannig urðu til auðugar gullnámur Andesfjalla, Klettafjalla, Alpafjalla, Harzfjalla og svo framvegis.

Í sama svari segir einnig að „auðunnar“ gullnámur séu nánast uppurnar. Í framtíðinni gætu menn leitað að gulli í fornum sprungum. Við bendum spyrjanda þessarar spurningar, og þeim sem hafa áhuga á gullgreftri, að leita frekari upplýsinga í svari Sigurðar.

Frá sjónarhóli hagfræðinnar er hins vegar lítil þörf fyrir meira gull. Um það er fjallað sérstaklega í svari við spurningunni Væri hægt að bjarga efnahag heimsbyggðarinnar með því að flytja loftstein úr gulli til jarðarinnar? - Myndband Meira en nóg er til af gulli á jörðinni og megnið af því sem hefur verið grafið úr jörðu er gagnslaust.

Mynd:

• Gold mining - Wikipedia, the free encyclopedia. (Sótt 11.11.2014).

Spurningin hljóðaði upprunalega svona:

Hvar er mesti möguleikinn að finna gull og hvernig væri þá best að vinna það?

...