Hvernig og hvenær varð ebóluveiran til?

Nafn þitt

Netfang þitt

Netfang móttakanda

Ruslpóstvörn =

Svar

Hvernig og hvenær varð ebóluveiran til?
Ebóluveira greindist fyrst í mönnum árið 1976 í Kongó og Súdan en hún hefur verið til miklu lengur. Hún hefur sýkt önnur dýr í aldanna rás, en er líklega bara nýverið farin að sýkja menn.

Sú útgáfa af ebóluveirunni sem sýkir menn, eins og nú í Afríku, varð til við stökkbreytingu, líklega fyrir um 850 árum, það er um miðja 12. öld. Stökkbreyting er það þegar arfgeng breyting verður á erfðaefni lífvera og sumar breytingar af því tagi festast með tegundinni vegna náttúrulegs vals.

Ebólaveiran tilheyrir ætt svonefndra þráðveira (Filoviridae) og er skyld svonefndri Marburg-veiru. Með því að greina mun á genum ebólu- og Marburg-veirunum hafa vísindamenn sýnt fram á að þráðveirurnar tvær hafi þróast frá sameiginlegum forföður fyrir um 700-850 árum síðar.

Rannsókn á ætt þráðveira sýnir ennfremur að þær hafa verið til í um 10.000 ár. Getgátur eru uppi um að sumar fornar plágur, eins og sú sem herjaði á íbúa í Aþenu 430 f.Kr., hafi verið af ætt þráðveira.

Blóðsýni úr mönnum frá ýmsum löndum í Mið-Afríku gefa til kynna að rúmlega 30% þeirra hafi mótefni fyrir ebóluveirunni. Mótefni hefur líklega myndast þegar menn komust í snertingu við óvirkar veirur, til dæmis af ávöxtum menguðum af munnvatni úr ávaxtaleðurblökum (Pteropodidae) en þær eru taldar vera forðahýsill ebóluveirunnar.

Heimildir:

• Ebola’s History, 3: Pre-1976 | Arcade Africa. (Skoðað 28.10.2014).
• Molecular evolution of viruses of the family Filoviridae based on 9... - PubMed - NCBI . (Skoðað 29.10.2014).
• WHO | Ebola virus disease. (Sótt 30.10.2014).

Mynd:

• TrekNature | Old world bats. Photo. (Sótt 29.10.2014).

Höfundur þakkar Arnari Pálssyni erfðafræðingi fyrir yfirlestur.

...