Hvað getur langreyður kafað djúpt og hversu lengi?

Nafn þitt

Netfang þitt

Netfang móttakanda

Ruslpóstvörn =

Svar

Hvað getur langreyður kafað djúpt og hversu lengi?
Langreyður (Balaenoptera physalus) er annað stærsta dýr jarðar á eftir steypireyði (Balaenoptera musculus). Fullorðinn langreyðartarfur getur vegið rúmlega 50 tonn og mælst rúmlega 18 metrar á lengd. Langreyðurin syndir hraðast allra reyðarhvala og er talin geta náð um 30 km hraða enda er hún nokkuð straumlínulagaðri en aðrir reyðarhvalir svo sem steypireyðurin.

Einhverjar rannsóknir hafa verið gerðar á öndun og köfun þessara stórvöxnu skepna. Meðal annars hafa verið fest á þau tæki sem gefa upplýsingar um ferðir hvalanna þannig að hægt er að fylgjast með hvert þeir fara og hversu djúpt þeir kafa. Niðurstöður slíkra rannsókna hafa sýnt að langreyðar fara oft niður á 200 m dýpi en dýpsta ferðalag langreyðar var niður á 470 m dýpi. Þegar langreyðar kafa eftir æti, til dæmis í Kaliforníuflóa, þá eru þær að jafnaði í kafi í 6 mínútur. Dýrin geta þó verið mun lengur í kafi án þess að koma upp til þess að anda, eða í allt að 17 mínútur.

Langreyðar koma á íslenska landgrunnið þegar vorið gengur í garð á hafsvæðinu umhverfis landið í mars / apríl og eru hér þar til haustar. Sennilega er lítið um langreyðar á miðunum umhverfis landið þegar kemur fram í seinni hluta október.

Heimild og mynd:

• Shirihai, H. og Jarrett, B. (2006). Whales, Dolphins and Other Marine Mammals of the World. Princeton Field Guides. pp. 43–45.
• Mynd: Fin Whale - Balaenoptera physalus - Wild about Britain. (Sótt 14. 10. 2013).

Upprunalega hljóðaði spurningin svona:

Hvað getur langreyður kafað djúpt og hversu lengi? Hvenær kemur hún til Íslands?

...