Hver er munurinn á mag. jur. og ML í lögfræði?

Nafn þitt

Netfang þitt

Netfang móttakanda

Ruslpóstvörn =

Svar

Hver er munurinn á mag. jur. og ML í lögfræði?
Með mag. jur. og ML í lögfræði er átt við meistarapróf í lögfræði, en bæði hugtökin koma úr latínu. Mag. jur. stendur fyrir magister juris, en magister þýðir meistari og juris er eignarfall eintölu orðsins ius, sem merkir réttur eða lög. Á Íslandi er mag. jur. notað um nemendur sem brautskrást með meistarapróf í lögfræði frá Háskóla Íslands. ML stendur fyrir Magister Legis og er notað á Íslandi um nemendur sem brautskrást með meistarapróf í lögfræði frá Háskólanum í Reykjavík, Háskólanum á Akureyri eða Háskólanum á Bifröst. Legis er eignarfall eintölu latneska orðsins lex sem þýðir lög. Munurinn felst í raun aðeins í því frá hvaða skóla er verið að brautskrást og hvaða hugtak sá skóli notar um meistaraprófið.

Áður fyrr var laganámi á Íslandi ekki skipt upp í grunn- og meistaranám, heldur luku nemendur embættisprófi í lögfræði eftir fimm ára nám, eða cand. jur. sem stendur fyrir candidata/candidatus juris. Ljúki maður grunn- og meistaranámi í lögfræði, sem að jafnaði tekur fimm ár, jafngildir það samanlagt embættisprófi í lögfræði, hvort sem um er að ræða magister juris eða Magister Leges.

Mynd:

• Navigating a path along the Berlin road to OA | Jisc

...