Hvað eru margar hitaeiningar í stórum snúð úr bakaríi og hvað þyrfti maður að borða marga slíka til að fullnægja orkuþörf dagsins?

Nafn þitt

Netfang þitt

Netfang móttakanda

Ruslpóstvörn =

Svar

Hvað eru margar hitaeiningar í stórum snúð úr bakaríi og hvað þyrfti maður að borða marga slíka til að fullnægja orkuþörf dagsins?
Mörgum krökkum og fullorðnum reyndar líka finnast snúðar ómótstæðilegir. Því miður eru þeir ekkert sérlega hollir en gefa nokkuð mikla orku.

Hér tökum við til skoðunar snúð með súkkulaði. Samkvæmt upplýsingum úr næringarefnatöflu á vef Matís þá eru 270 hitaeiningar eða 1130 kj í hverjum 100 g af súkkulaðisnúð. Sjálfsagt er þetta aðeins breytilegt á milli snúða, ekki er víst að hráefnin í þeim séu nákvæmlega alltaf í sömu hlutföllum hjá mismunandi framleiðendum en talan er örugglega ágætt viðmið.

Snúðar eru misstórir. Við gerð þessa svars var því miður ekki hægt að ganga á milli margra bakaría og vigta snúða en í einu bakaríi sem heimsótt var reyndist stór snúður með súkkulaði vera 250 g. Ef það eru 270 hitaeiningar í hverjum 100 g þá inniheldur einn slíkur snúður 675 hitaeiningar. Á vef Myllunnar er dæmi um snúð með súkkulaði sem er 190 g. Í einum slíkum snúð eru um 513 hitaeiningar.

Orkuþörf einstaklinga er mismikil og fer meðal annars eftir aldri og kyni, líkamsþyngd og hreyfingu hvers og eins. Algengt er að orkuþörfin sé á bilinu 2000-2500 hitaeiningar á dag hjá fólki sem er nálægt meðalþyngd og stundar meðalhreyfingu. Einn snúður getur því gefið einn fjórða eða jafnvel meira af þeirri orku sem líkaminn þarfnast til daglegra starfa.

Til þess að fullnægja daglegri orkuþörf þurfa menn því einungis að borða fjóra slíka snúða. Rétt er að taka fram að það telst ekki hollt mataræði!

Heimildir og mynd:

• Næringarefnatöflur á Matís.
• Ráðleggingar um mataræði og næringarefni. Lýðheilsustöð 2006.
• Myllan.
• Mynd: EDS.

...