Getið þið sagt mér sögu Titanic?

Nafn þitt

Netfang þitt

Netfang móttakanda

Ruslpóstvörn =

Svar

Getið þið sagt mér sögu Titanic?
Eitt þekktasta og mannskæðasta sjóslys allra tíma varð 15. apríl árið 1912 þegar risaskipið RMS Titanic fórst með um 1.500 manns.

Titanic var á þessum tíma eitt stærsta gufuknúna farþegaskip í heimi. Skipið var 269 m langt og 28 metra breitt, eigin þyngd þess var 46.328 tonn en mögulegur heildarþungi skipsins, særými, var 66.000 tonn. Það var jafnframt með þeim allra glæsilegustu. Um borð var meðal annars bókasafn, sundlaug, íþróttasalur, veggtennissalur og tyrkneskt bað. Sagt var að skipið væri ósökkvanlegt, svo haganlega væri það byggt. Annað kom þó á daginn.

Titanic hóf jómfrúarferð sína 10. apríl árið 1912 þegar það sigldi úr höfn í Southhamton, Englandi. Áætlunarstaður var New York í Bandaríkjunum, með viðkomu í Frakklandi og á Írlandi. Fjórum dögum seinna, 14. apríl 1912, var skipið statt um 600 km suður af Nýfundnalandi. Rétt fyrir miðnætti sáu tveir áhafnarmeðlimir allt í einu að skipið stefndi rakleiðis á stóran ísjaka. Annar þeirra hringdi strax í yfirmenn áhafnarinnar og lét vita að það sæist „ísjaki, beint af augum“. Strax var gefin skipun um að beygja frá, en það dugði ekki til og skipið rakst utan í ísjakann. Við það rofnaði skipsskrokkurinn og sjór flæddi inn.

Skömmu eftir miðnætti, þann 15. apríl, varð ljóst að Titanic myndi sökkva. Þá var sent út neyðarkall og hafist handa við að rýma skipið og koma fólki í björgunarbáta. Ekkert skip var þó svo nálægt að það gæti komið til hjálpar í tæka tíð, utan eitt, en það ansaði ekki kallinu. Margir farþeganna gerðu sér ekki grein fyrir því hversu mikil hætta var á höndum, og voru hikandi við að yfirgefa Titanic. Allmargir björgunarbátar voru því settir á flot hálftómir. Að auki voru ekki nægjanlega margir björgunarbátar á skipinu til að rúma alla farþega og áhafnarmeðlimi.

Of fáir björgunarbátar voru í Titanic, og þeir sem þó voru á skipinu voru ekki fullnýttir.

Klukkan rúmlega tvö eftir miðnætti fór svo að Titanic endasteyptist og brotnaði í tvennt, og sökk að lokum í kaf. Aðeins um þriðjungur allra, eða um 700 manns, komst í björgunarbáta og var bjargað. Aðrir, um 1500 manns, drukknuðu eða létust úr ofkælingu.

Eftir að Titanic sökk voru reglur um öryggismál á sjó hertar til muna. Brak Titanic fannst svo 1. september 1985 á 4.000 metra dýpi. Þann 6. maí árið 2006 dó síðasti farþegi Titanic sem mundi eitthvað eftir slysinu. Hún hét Lillian Gertrud Asplund og var fimm ára þegar slysið varð. Tveir farþegar eru eftirlifandi, en báðir voru þeir undir eins árs aldri þegar Titanic sökk og muna því ekkert eftir þessu hræðilega atviki.

Heimildir:

• RMS Titanic. Wikipedia: The Free Encyclopedia.
• The Titanic tradegy. Sunk between CQD and SOS.
• Titanic. Encyclopædia Britannica Online.
• Titanic: Researcher's note. Encyclopædia Britannica Online.

Myndir:

• File:En mary titanic.svg - Wikimedia Commons. (Sótt 12.01.2016).
• Mynd af björgunarbáti er af síðunni Image:Titanic-lifeboat.gif. Wikimedia Commons.

---

Þetta svar er eftir nemendur í Háskóla unga fólksins, námskeiðum á vegum HÍ fyrir 12-16 ára ungmenni í júnímánuði 2006.

---

Vilbergur Magni Óskarsson, sviðstjóri skipstjórnarsviðs Fjöltækniskóla Íslands, fær þakkir fyrir upplýsingar um eigin þyngd og særými Titanic.

...