Hefur vindur áhrif á þráðlaust net?

Nafn þitt

Netfang þitt

Netfang móttakanda

Ruslpóstvörn =

Svar

Hefur vindur áhrif á þráðlaust net?
Spurningin í fullri lengd hljóðaði svona:

Ef ég er að stelast inn á nettengingu nágrannans, geta þá hlutir eins og vindátt verið áhrifavaldar í því hversu sterka tengingu ég fæ hverju sinni? Það er mikill dagamunur á þessu!

Þráðlaust net er rafsegulbylgja á útvarpsbylgjutíðni (2,4 GHz eða 5 GHs) sem kemur frá netbeini (e. router). Styrkur á þráðlausu neti á ákveðnum stað fer mest eftir því hve langt er í netbeininn og því hvort eitthvað er á milli netbeinis og tækisins sem notar netið.

Oftast eru bæði netbeinir og tækið sem er að nota þráðlausa netið inni í sama húsinu, en ef netbeinir er í öðru húsi er rökrétt að velta fyrir sé hvort veðrið hafi áhrif á netsambandið.

Rafsegulbylgja notar ekki efni til að ferðast og getur því ferðast í tómarúmi eins og lýst er í svari við spurningunni Hver er munurinn á hljóði og útvarpsbylgjum? Efnið sem bylgjan fer um hefur hins vegar áhrif á styrk merkisins, sem veikist eftir því sem meira efni er á leiðinni.

Af þessu getum við dregið þá ályktun að vindur hafi ekki áhrif á styrk þráðlauss nets vegna þess að það skiptir ekki máli þó loftið sem rafsegulbylgjan fer um sé á hreyfingu, svo fremi sem það er jafn efnismikið (eða efnislítið). Hins vegar getur vindur fært eitthvað til, eins og til dæmis trjágreinar, sem gæti breytt styrk nets á ákveðnum stað.

Það eru meiri líkur á að úrkoma hafi áhrif á styrk þráðlausa netsins vegna þess að regndroparnir geta gleypt hluta orkunnar (merkisins). Sama gildir um snjókomu, sem er líklegri til að valda truflun en rigning vegna þess að snjókorn eru stærri og nær bylgjulengd þráðlausa netsins (bylgjulengd 5 GHz rafsegulbylgju er 6 cm).

Áhrifin sem veðrið hefur á það hvernig merki frá netbeini skilar sér til tækis sem er að nota þráðlaust net eru líklega lítil. Ef netsamband er lélegra í vondu veðri en góðu er líklegra að það sé vegna meira álags á netbeininn, til dæmis ef margir notendur eru samtímis að gera eitthvað sem krefst mikillar bandvíddar, eins og að spila tölvuleik, hringja myndsamtöl eða horfa á bíómynd á netinu.

Frekara lesefni:

• Hver er munurinn á hljóði og útvarpsbylgjum?
• Er það satt að ekkert hljóð heyrist úti í geimnum?
• How to improve wireless network signal range and strength - Comparitech. (Sótt 31.01.2022).

Mynd:

• Snowstorm | Atli Harðarson | Flickr. (Sótt 31.01.2022). Myndin er birt undir leyfinu Creative Commons — Attribution-NoDerivs 2.0 Generic — CC BY-ND 2.0.

...