Hvernig rata himbrimaungar til vetrarstöðvanna?

Nafn þitt

Netfang þitt

Netfang móttakanda

Ruslpóstvörn =

Svar

Hvernig rata himbrimaungar til vetrarstöðvanna?
Spurningin í fullri lengd hljóðaði svona:

Hvernig rata himbrimaungar til vetrarstöðva fyrst foreldrarnir fara á undan?

Þegar ungar himbrima verða eftir á klakvötnum sínum hafa þeir ekkert til að leiðbeina sér annað en eðlisávísun og reynsluna sem þeir hafa öðlast eftir aðeins um 11 vikna umsjá foreldra sinna. Erfitt er að segja til um hvort uppeldi spili einhvern þátt í vetrarfari himbrima. Þótt ungarnir séu byrjaðir að fljúga áður en foreldrarnir yfirgefa þá, er talið líklegast að eðlisávísunin, og nauðsyn, ráði förinni.

Vetrarfar himbrima til sjávar er óumflýjanlegt því þeir geta ekki kafað eftir fæðu í vötnum sem eru frosin á veturna. Auk þess eru þeir mjög klunnalegir á þurru landi, sökum þess hve einstaklega vel þeir eru aðlagaðir sundi og köfun í vatni.

Lítið er vitað um vetrarfar himbrima og unga þeirra á Íslandi en í Norður-Ameríku, þar sem meirihluti himbrima verpir, hafa miklar rannsóknir verið gerðar. Þar fljúga þeir til vetrarstöðva, annað hvort suðvestur til Kyrrahafs eða suðaustur til Mexíkóflóa/Atlantshafs.

Hæfni þeirra til að rata til sjávar, sem getur verið í meira en 2.000 km fjarlægð, byggist líklega á því að þeir eru skilyrtir af náttúrunnar hendi til að stefna á sömu vetrarstöðvar og foreldrar þeirra. Þessi skilyrðing hlýtur að vera háð ákveðnum umhverfisþáttum en erfitt er að segja hverjir þeir nákvæmlega eru. Mögulega kemur ákveðin stefna miðað við segulsvið jarðar þar við sögu.

Þegar ungarnir eru komnir til sjávar nema þeir staðar. Nálægð við ströndina og fæðuframboð skipta þar væntanlega miklu máli.

Til gamans má geta að í ágúst 2014 fór höfundur þessa svars til Bandaríkjanna og tók þátt í því að merkja unga himbrimafugla með gervihnattasendum áður en þeir fóru í sitt fyrsta vetrarfar. Hægt er að fylgjast nákvæmlega með ferðum þeirra hér: Common Loon Migration Study - Migration Data

Mynd:

• Common Loon with Chick | Flickr - Photo Sharing!. (Sótt 11.11.2015). Myndin er birt undir leyfinu Creative Commons — Attribution-ShareAlike 2.0 Generic — CC BY-SA 2.0

...