Hvað notar meðalheimili á Íslandi mörg vött af rafmagni?

Nafn þitt

Netfang þitt

Netfang móttakanda

Ruslpóstvörn =

Svar

Hvað notar meðalheimili á Íslandi mörg vött af rafmagni?
Heimili landsins nota raforku til að knýja hin ýmsu tæki en einnig til lýsingar innan- og utanhúss. Síðan má ekki gleyma því að um 8-9% heimila nota raforku til húshitunar.

Á Vísindavefnum er fróðleg grein eftir Þorstein Vilhjálmsson sem hann kallar Orkumenning og orkusaga. Þar fjallar hann meðal annars um hvernig raforkuþörf íslenskra heimila jókst mikið með því sem Þorsteinn kallar innreið þungra heimilistækja á tímabilinu um 1940-1985. Það tímabil einkenndist af síaukinni notkun á tiltölulega orkufrekum tækjum á heimilunum – tækjum sem komu á markaðinn hvert af öðru og urðu smám saman sjálfsagður hlutur á hverju heimili. Fyrst var það rafmagnseldavélin, síðan fyrsta kynslóð af einföldum þvottavélum og rafknúnum þvottapottum, þá sjálfvirkar þvottavélar, svo ísskápar, frystikistur og loks uppþvottavélar og þurrkarar.

Fjöldi, stærð og notkun heimilistækja og þar með rafmagnsnotkun heimilisins eru að verulegu leyti háð fjölda og aldri einstaklinga á heimilinu. Í efni á vef Orkuveitu Reykjavíkur um bætta orkunýtingu á heimilum kemur fram að til einföldunar megi skipta orkunotkun á heimilum í þrjá flokka eftir fjölda íbúa:

• Lítil heimili: 2-3 einstaklingar, engin smábörn, rafmagnsnotkun 2.200-3.000 kWh á ári (6-8 kWh á dag).
• Meðalstór heimili: 4 einstaklingar, smábörn, algengustu heimilistæki, rafmagnsnotkun 3.600-4.200 kWh á ári (10-12 kWh á dag).
• Stór heimili: 4-6 einstaklingar, flestöll heimilistæki, rafmagnsnotkun 4.800-5.500kWh á ári (13-15 kWh á dag).

Jafnframt er sýnt hvernig dæmigerð skipting orkunotkunar hjá meðalfjölskyldu gæti litið út:

Athugið að í tölunum hér að ofan er húshitun undanskilin, en þar sem hús eru kynnt með rafmagni fer 70-90% raforkunnar í hitun samkvæmt upplýsingum á vef Orkuseturs og því mun meiri raforkunotkun en þar sem hús eru kynnt á annan hátt.

Heimildir og gröf:

• Þorsteinn Vilhjálmsson. „Orkumenning og orkusaga“. Vísindavefurinn 13.10.2001. (Skoðað 11.12.2012).
• Raforkumenning - Bætt orkunýting á heimilum. Orkuveita Reykjavíkur. (Skoðað 11. 12. 2012).
• Orkusetur - Raforka. (Skoðað 11. 12. 2012).

...