Er hægt að losna við möl eða egg flugunnar með því að frysta flíkina?

Nafn þitt

Netfang þitt

Netfang móttakanda

Ruslpóstvörn =

Svar

Er hægt að losna við möl eða egg flugunnar með því að frysta flíkina?
Til eru nokkrar tegundir fiðrilda sem í daglegu tali eru kallaðar mölflugur. Sumar lifa á matvælum en aðrar frekar á ullar- og skinnavöru. Mölur er ekki eins algengt vandamál og áður fyrr, aðallega vegna þess að fatnaður nú til dags er yfirleitt úr öðrum efnum en mölurinn þrífst á.

Samt sem áður geta mölflugur hafst við í híbýlum okkar við sérstakar aðstæður. Þær geta til dæmis þrifist í ullar- eða veggteppum, eins eru vatnslagnir í veggjum gamalla húsa gjarnan einangraðar með ullarfóðri og þar hafa stundum komið upp vandamál vegna mölflugna. Skaðvaldurinn í þeim tilvikum er fyrst og fremst svonefndur fatamölur eða gulur fatamölur (Tineola bisselliella) en til eru þrjár aðrar mölflugutegundir hér á landi; ullarmölur, húsmotti og gestamotti.

Áður fyrr var algengt að nota mölkúlur til þess að fæla mölinn frá ullarfatnaði en nú þykir það ekki endilega æskilegasta aðferðin. Á Netinu er að finna ýmsar síður með ráðleggingum um hvernig hægt er að losna við möl úr fatnaði. Ein aðferðin er einmitt að frysta flíkina eins og hér er spurt um. Þá er ráðlagt að pakka henni inn í plastpoka, lofttæma pokann eins og hægt er, loka vel og frysta í nokkra daga. Einnig er hægt að setja flíkina í hreinsun þar sem þau efni sem þar eru notuð eiga að drepa mölinn. Líka má reyna að setja flíkina í þurrkara þar sem hitinn drepur eggin og lirfurnar.

Fleiri ráðleggingar má finna á netinu, til dæmis með því að nota leitarorðin "Clothing Moth". Rétt er að taka það fram að ekki hefur verið gerð tilraun á Vísindavefnum á því hversu góðar þessar aðferðir eru þannig að hér verður ekki mælt með einni aðferð frekar en annarri.

Að lokum er rétt að benda á að ef mölur er vandamál gæti verið skynsamlegt að ráðfæra sig við meindýraeyði.

Frekari fróðleikur á Vísindavefnum:

• Hvað er mölur? eftir Jón Má Halldórsson

Heimildir og mynd:

• "Ullarmölur orðinn sjaldgæfur". Viðtal við Erling Ólafsson skordýrafræðing á Mbl.is, laugardaginn 2. september, 2000.
• Tineola bisselliella á Wikipedia.
• How to Get rid of Moths á How to Get Rid of Things.
• Mynd af mölflugu: Leo Pest Control. Höfundur myndar: Olaf Leillinger. Birt undir Creative commons Attribution ShareAlike 2.5 leyfi. Sótt 13. 9. 2010.
• Mynd af mölskemmdum: Jacobsen Oriental Rugs. Sótt 13. 9. 2010.

---

Hér er einnig svarað spurningunum:

• Hvernig er best að eyða mölflugum?
• Hvernig á að bregðast við ef mölur er komin í föt og húsgögn?

...