Hversu margir starfa við landbúnað á Íslandi og hversu margir við sjávarútveg?

Nafn þitt

Netfang þitt

Netfang móttakanda

Ruslpóstvörn =

Svar

Hversu margir starfa við landbúnað á Íslandi og hversu margir við sjávarútveg?
Í stuttu máli sagt vinna flestir Íslendingar störf sem tengjast þjónustu.

Hagstofa Íslands hefur um alllangt skeið gert vinnumarkaðsrannsóknir í því skyni að afla haldbærra og greinargóðra gagna um vinnumarkaðinn hér á landi. Þetta svar er byggt á niðurstöðum úr þeim rannsóknum eins og þær birtast á vef Hagstofunnar.

Ef störfum er skipt í mjög grófa flokka þar sem landbúnaður og fiskveiðar mynda einn flokk, öll framleiðslustarfsemi sett saman í annan flokk og öll þjónustustarfsemi í þann þriðja kemur í ljós að árið 2012 var um 5,8% vinnuafls starfandi við landbúnað og fiskveiðar, 18,2% vinnuafls sinnti störfum sem teljast til framleiðslustarfsemi en rúmlega þrír fjórðu, eða 76%, vann störf sem tengjast þjónustu.

Hagstofan er líka með ýtarlegri flokkun þar sem landbúnaður og fiskveiðar eru ekki sett saman og framleiðslu- og þjónustustarfsemi nánar greind niður. Ef sú flokkun er skoðuð kemur í ljós að hlutfallslega flestir starfa við verslunar- og viðgerðaþjónustu en þar á eftir koma fræðslustarfsemi og heilbrigðis- og félagsþjónusta eins og sjá má á myndinni hér fyrir neðan.

Hér er gefið upp hlutfall en spurt var sérstaklega um hversu margir starfa í landbúnaði og sjávarútvegi. Árið 2012 unnu um 4.900 við landbúnað, 4.800 við fiskveiðar og 4.100 við fiskvinnslu.

Mynd: Unnin upp úr gögnum frá Hagstofu Íslands. ...