Hvaða afleiðingar hafa pólskipti fyrir líf á jörðinni?

Nafn þitt

Netfang þitt

Netfang móttakanda

Ruslpóstvörn =

Svar

Hvaða afleiðingar hafa pólskipti fyrir líf á jörðinni?
Áður en lengra er haldið er lesendum bent á að kynna sér svar sama höfundar við spurningunni Hvað eru pólskipti?

Pólskipti hafa mjög óverulegar afleiðingar fyrir lífið á jörðinni; engar breytingar sjást til dæmis á steingervinga-samfélögum í sjávarseti við pólskipti.

Tvennt hefur helst verið nefnt. Annars vegar að geimgeislun við yfirborð jarðar aukist meðan segulsvið hennar er dauft. Segulsviðið beinir nefnilega slíkri geislun, það er rafhlöðnum hraðfara ögnum frá sól eða úr Vetrarbrautinni, að nokkru í burtu frá jörðinni. Þetta gæti bæði haft einhver áhrif á veðurfar og á tíðni stökkbreytinga í erfðaefni. Áhrifin yrðu tímabundin og líkast til minniháttar.

Talið er að fuglar noti segulsvið jarðar til þess að hjálpa sér að rata um langar vegalengdir.

Hins vegar hafa sumir haft áhyggjur af örlögum þeirra æðri og lægri dýrategunda sem virðast nota sér jarðsegulsviðið til ratvísi, svo sem við fæðuleit eða í langferðum. Þó er líklegt að breytingar segulsviðsins séu nógu hægar til þess að dýrunum takist að aðlaga sig að þeim.

Vert er að taka fram einnig að lokum, að pólskipti segulsviðsins eru ekki talin hafa nein áhrif á hinn daglega snúning jarðar um sjálfa sig né á staðsetningu heimskautanna.

Frekari fróðleikur á Vísindavefnum

• Hvaða áhrif hefur umpólun jarðsegulsviðsins á daglegt líf, og hversu hratt gerist hún?
• Hvernig geta fuglar ratað svona langar vegalengdir?

Mynd: Telegraph.co.uk. Sótt 7. 9. 2009...