Ef við byggjum í fjórvíðum heimi hvað þyrftum við þá mörg augu til að sjá í fjórvídd?

Nafn þitt

Netfang þitt

Netfang móttakanda

Ruslpóstvörn =

Svar

Ef við byggjum í fjórvíðum heimi hvað þyrftum við þá mörg augu til að sjá í fjórvídd?
Svarið er að tvö augu nægja fjórvíðu rúmi og raunar rúmi af hvaða vídd sem er til að skynja allar víddir rúmsins í einu.

Fyrst er gott að einfalda dæmið eins mikið og komast má upp með, það er að segja að skoða auga í tvívíðu rúmi. Á myndinni hér fyrir neðan sést hvernig auga býr til mynd út frá stefnu hluta. Svo gera megi fullkomna mynd af rúminu þarf þó einnig að þekkja fjarlægð hlutanna frá áhorfandanum.

Myndin sem fæst er þá útflött á þann hátt að í hana skortir vídd fjarlægðarinnar. Í tvívíðum fleti kæmi mynd sem er eins og hringur eða hluti úr hring og því einvíð. Ef bætt er við öðru auga í fastri fjarlægð frá hinu getur þó eigandi auganna borið saman myndirnar tvær og áætlað út frá mismun þeirra um afstæðar fjarlægðir.

Mynd augans er svo tvívíð hjá venjulegu, þrívíðu fólki og almennt segir rúmfræðin okkur að sú mynd sem lýsir á þennan hátt stefnu hluta frá einhverjum punkti í rúmi af ótilgreindri vídd, án þess að taka tillit til fjarlægðar, er best lýst með einni gerð svokallaðra háflata í rúminu. Slíkur háflötur er af einni vídd neðar en rúmið sem hann liggur í (ólíkt venjulegum fleti, sem er tvívíður). Líkt og sú mynd sem berst auga í venjulegu þrívíðu rúmi er tvívið yrði myndin þá þrívíð í fjórvíðu rúmi.

Í fjórvíðu rúmi ætti haganlega skapað auga því að geta numið þrívíða mynd af fjórvíðu umhverfi sínu. Líkt og í lægri víddum skortir stakt auga upp á fjarlægðarskynjun en afstæða fjarlægð til hluta mætti einnig vel greina með myndum sem berast frá tveimur augum með skikkanlega fjarlægð á milli. Því dygðu tvö augu lífveru í fjórvíðu rúmi til þess að „sjá í fjórvídd.“

Þetta er þó allt að því gefnu að aðstæður þessa fjórvíða rúms væru sambærilegar því sem menn eiga að venjast í þrívíðu rúmi (að svo miklu leyti sem rúm af ólíkri vídd geta annars talist). Auk þess gætir hér svolítillar einföldunar á fjarlægðarskynjun manna. Meira má lesa um fjarlægðarskyn í svari Heiðu Maríu Sigurðardóttur við spurningunni Hvernig verkar þrívídd í bíómyndum?

Myndir:

• Hand with Reflecting Sphere - Wikipedia, the free encyclopedia. (Sótt 2.7.2012).
• Aðrar myndir eru höfundar.

...