Hvert norðulandamálanna fimm líkist mest frumnorrænu?

Nafn þitt

Netfang þitt

Netfang móttakanda

Ruslpóstvörn =

Svar

Hvert norðulandamálanna fimm líkist mest frumnorrænu?
Norðurlandamálin eru oft einungis talin íslenska, norska, danska, sænska og finnska en rétt er að telja einnig með færeysku, grænlensku og samísku. Af þessum málum eru finnska, grænlenska og samíska ekki germönsk mál og því ekki skyld hinum fimm sem vanalega eru kölluð norræn mál.

Germönsk mál skiptust snemma í norður-, vestur- og austurgermönsk mál. Sameiginlegt forstig norðurgermanskra mála er kallað frumnorræna. Þau skiptust síðar í vesturnorræn mál (íslenska, færeyska, norska) og austurnorræn mál (danska, sænska). Fornnorræna er það mál kallað sem talað var á Íslandi og Noregi frá um 900 og fram til 1350.

Íslenska hefur breyst minnst frá tíma fornnorrænu. Færeyskan stendur síðan næst íslensku. Myndin er frá Færeyjum.

Þeir sem námu land á Íslandi og í Færeyjum komu flestir frá Vestur-Noregi og töluðu því nánast sama málið. Þegar kom fram á 14. öld fór að verða merkjanlegur munur á íslensku og norsku. Öll norrænu málin hafa þróast, orðið fyrir áhrifum frá öðrum málum og breyst í aldanna rás. Ef litið er á tengsl norrænna nútímamála hvað gagnkvæman skilning varðar skiptast þau þannig:

• Eyjanorræna: íslenska, færeyska
• Skandínavíska:
  1. norðurskandínavíska – norska, sænska;
  2. suðurskandínavíska – danska.

Íslenska hefur breyst minnst af norrænum málum frá tíma fornnorrænu. Hún er þó talsvert ólík frumnorrænu. Færeyska stendur næst íslensku og síðan norska, einkum norskar mállýskur á vesturströnd Noregs.

Frekara lesefni á Vísindavefnum:

• Hvernig varð íslenskan til? eftir Guðrúnu Kvaran
• Er nauðsynlegt að við varðveitum tungumál okkar eða er þetta óþörf fornaldardýrkun? eftir Kristján Árnason
• Er til einhver skýring á því að svo ólík tungumál sem íslenska og finnska eiga það sameiginlegt að áhersla er alltaf á fyrsta atkvæði orðs? eftir Guðrúnu Kvaran
• Töluðu Danir og Íslendingar einhvern tíma sama tungumálið? eftir Guðrúnu Kvaran

Mynd:

• Tectonic evolution of Greenland/Faeroe region. Sótt 8.9.2009.

...