Hver eru helstu viðskiptalönd Íslands í útflutningi?

Nafn þitt

Netfang þitt

Netfang móttakanda

Ruslpóstvörn =

Svar

Hver eru helstu viðskiptalönd Íslands í útflutningi?
Það er vissum erfiðleikum háð að flokka þjónustuútflutning eftir löndum en tölur um skiptingu vöruútflutnings liggja fyrir. Þeim er safnað af Hagstofunni. Árið 2002 fluttu Íslendingar út mest af vörum til Þýskalands eða fyrir um 38 milljarða króna. Litlu minna fór til Bretlands eða fyrir 36 milljarða króna. Þá fóru vörur til Hollands fyrir 22 milljarða króna en rétt er að hafa í huga að algengt er að vörur sem fara eiga til meginlands Evrópu eða jafnvel landa utan Evrópu séu fyrst fluttar til Hollands enda eru þar umsvifamiklar hafnir. Nokkurn veginn jafnmikið fór til Bandaríkjanna. Spánverjar keyptu af okkur vörur fyrir tæpa 11 milljarða króna og Danir, Norðmenn og Portúgalir fyrir um níu milljarða hver þjóð.

Fluttar voru út vörur frá Íslandi þetta ár fyrir alls 203 milljarða króna. Af þessu fóru 144 milljarðar til Evrópusambandsríkja og þar af 97 milljarðar til landa sem nota evrur. Rétt tæpur helmingur af útflutningi frá landinu þetta ár fór því til landa sem nota evrur. Innflutningurinn skiptist aðeins öðruvísi. Við fluttum inn vörur frá Bandaríkjunum fyrir 23 milljarða króna, frá Þýskalandi fyrir 22 milljarða króna, nær 18 milljarða frá Danmörku og tæpa 17 milljarða frá Noregi. Frá Bretlandi fluttum við inn vörur fyrir 15,5 milljarða, 12,5 frá Hollandi og rúma 12 frá Svíþjóð.

Fluttar voru inn vörur til landsins fyrir 208 milljarða króna þetta ár. Þar af komu vörur fyrir 109 milljarða króna frá Evrópusambandslöndunum og þar af fyrir 64 milljarða frá löndum sem nota evrur. Tæpur þriðjungur af innflutningi Íslendinga kom því frá löndum sem nota evrur.

Frekara lesefni á Vísindavefnum:

• Er viðskiptahalli slæmur? eftir starfsfólk Hagfræðistofnunar Háskóla Íslands

...