Sólin
Rís 10:17 • sest 16:10
Tunglið
Rís 21:40 • Sest 15:54
Flóð
Árdegis: 10:12 • Síðdegis: 22:46
Fjara
Árdegis: 03:46 • Síðdegis: 16:36
Þrátt fyrir rækilega leit og víðfeðmar fyrirspurnir tókst okkur því miður ekki að finna opinberar upplýsingar um veiðar með þráðlausu neti. Við gerum þó ráð fyrir að kvótakerfi gildi um slíkar veiðar eins og allar alvöru veiðar nú á dögum. Einnig höldum við að möskvastærð í þráðlausu neti sé í grófari kantinum og því lítið gagn í því til veiða á smáfiski. Reglur um möskvastærð er hægt að kynna sér hér á heimasíðu Sjávarútvegsráðuneytisins. En þótt Sjávarútvegsráðuneytið hafi ekki upplýsingar um þráðlausa netið höfum við af því spurnir að þetta net hafi reynst vel við veiðar á svokölluðum tölvunördum (Nerdus digitalis) sem sagðir eru vera á stærð við okkur mannfólkið. Tölvunördar þykja seigir undir tönn og Manneldisráð mælir ekki með neyslu þeirra, enda er hún víst ólögleg. Þeir hafa hins vegar þótt vel brúklegir til undaneldis og til ýmissa heimilisstarfa. Einnig þykja þeir oft viðkunnanlegir í samskiptum. Þó þarf að gæta þess að tölvufíknin glepji ekki tölvunördinn frá öðrum verkum. Þá er rétt að geta þess í framhjáhlaupi að við höfum áður fjallað um nörda hér á Vísindavefnum og getur lesandinn notað leitarvélina okkar til að finna önnur svör þar sem þeirra er getið.
Aðferðin til að veiða tölvunörda felur í sér að egna gildru með því að nefna orð á borð við háhraðatengingu, gagnaflutning og gígabæti. Síðan er nördinum hreinlega sagt frá netinu en tölvunördar þyrpast að þráðlausu neti eins og flugur að sykurmola (eða skítaskán, eftir atvikum). Þetta er mjög heiðarleg og hreinskilnisleg veiðiaðferð þar sem engin tilraun er gerð til að fela veiðitækið fyrir fórnarlambinu. Hafi fólk ekki yfir þráðlausu neti að ráða má reyna önnur og ófullkomnari veiðitæki eins og sælgæti eða kaffi, sem margir tölvunördar eru sólgnir í. Meðal annarra veiðarfæra sem ekki er fjallað um hjá Sjávarútvegsráðuneytinu má nefna blekkingarvef sem á auðvitað ekkert skylt við Vísindavefinn eins og lesendur okkar vita manna best; þeim er fullljóst að við höfum alltaf það sem sannara reynist nema þá í föstudagssvörum eins og þessu, en þá vita tryggir lesendur líka hverju þeir eiga von á. En okkur sýnist, hvað sem öðru líður, að um þráðlaus net muni gilda eftirfarandi rökhenda:
Öll þráðlaus net eru ný. Ekki ber að trúa neinu eins og nýju neti. --- Ekki ber að trúa þráðlausum netum.Þetta þýðir væntanlega að við eigum ekki að trúa því sem berst að okkur með þráðlausu neti. Lesandinn ætti því að kynna sér hvernig þetta svar hefur komist til hans og hugleiða síðan hverju hann vill trúa af því sem í því stendur. Þetta föstudagssvar birtist að vísu frekar seint á föstudegi en það er vegna þess að einn af höfundunum er búsettur vestan hafs og er þess vegna á öðrum stað í tímanetinu en við hér á Íslandi. En menn eiga sem sé ekki að taka þetta svar alvarlega frekar en önnur föstudagssvör.
