Sólin
Rís 10:17 • sest 16:10
Tunglið
Rís 21:40 • Sest 15:54
Flóð
Árdegis: 10:12 • Síðdegis: 22:46
Fjara
Árdegis: 03:46 • Síðdegis: 16:36
Hvers konar starf fer fram innan Vísindakirkjunnar?Á íslensku virðist orðið vísindakirkja notað sitt á hvað um tvær óskyldar trúarhreyfingar. Önnur kallast á ensku Church of Scientology og verða henni gerð skil í þessu svari. Hin hreyfingin er kölluð Church of Christ, Scientist eða Christian Science og um hana má lesa hér.
Vísindakirkjan (Church of Scientology) var stofnuð í Los Angeles um miðjan 6. áratug síðustu aldar. Stofnandi hennar var Lafayette Ronald Hubbard (1911-1986). Hann var vel þekktur fyrir vísindaskáldsögur sínar en skrifaði að auki fjölda annarra verka. Að sögn talsmanna Vísindakirkjunnar eru meðlimir hennar um 8 milljónir í 120 löndum. Svo vill til að Vísindakirkjan hefur notið mikilla vinsælda meðal kvikmyndaleikara í Hollywood og annarra stjarna og meðal meðlima hennar má nefna John Travolta, Tom Cruise og Lisu Marie Presley.
Samkvæmt kenningum Vísindakirkjunnar er manneskjan hvorki hugur né líkami heldur andleg vera, þetan. Hugurinn skiptist í tvennt, rökræna vitund og svo undirvitund sem bregst við ýmiss konar áföllum og áreiti, bæði andlegum og líkamlegum, sem einstaklingurinn verður fyrir um ævina. Þetta áreiti er sagt skilja eftir sig ör, engrams, á undirvitundinni og þessi ör eru undirrót helstu vandamála sem viðkomandi á við að stríða.
Til að losna við hin sálrænu ör fer Vísindakirkjufólk gegnum viðtalsferli sem kallað er auditing þar sem notast er við sérstakt tæki sem kallað er E-mælir. E-mælirinn er sagður mæla andlega vanlíðan viðkomandi með því að mæla rafsegulviðnám líkamans. Þegar fólki hefur tekist að losna við engram-örin verður það “hreint” (clear). Takmarkið er svo að verða “OT” eða “Operating Thetan” sem hefur náð fullkomnun og getur hafið sig yfir efni og orku, tíma og rúm. Að auki trúir Vísindakirkjufólk á endurholdgun.
Eftir því sem Vísindakirkjufólk kemst ofar í þróunarferli sínu innan safnaðarins fær það aðgang að meiri upplýsingum um heimsmyndina sem sett er fram. Þessi heimsmynd er sögð líkjast því sem fram kemur í vísindaskáldsögum L. Ron Hubbard. Meðal annars kemur fram að geimvera að nafni Xenu hafi fyrir 75 milljónum ára sent billjónir þetana til jarðarinnar, sprengt í loft upp og heilaþvegið. Þessir þetanar eru enn á jörðinni, líkamslausir í klösum, og festa sig á okkur mannfólkið nema við losum okkur við þá með viðtalsferlinu sem nefnt er hér að ofan. Upplýsingum sem þessum er haldið leyndum fyrir utanaðkomandi aðilum og hefur Vísindakirkjan meðal annars staðið í deilum við fólk sem hefur birt leynilegu upplýsingarnar á vefsíðum sínum.
Ýmsir hópar hafa barist gegn Vísindakirkjunni og því hefur meðal annars verið haldið fram að hún hirði óheyrilegar fjárhæðir af meðlimum sínum og að meðlimirnir séu heilaþvegnir. Erfitt er þó að greina sannindi frá ósannindum í ásökunum sem þessum og er engin afstaða tekin til sannleiksgildis þeirra hér.
Heimildir:
- Religioustolerance.org
- Religious Movements Homepage
- Opinber heimasíða Vísindakirkjunnar
- Operation Clambake -- vefsetur helgað gagnrýni á Vísindakirkjuna
