Af hverju eru trýni á hundum alltaf blaut?

Nafn þitt

Netfang þitt

Netfang móttakanda

Ruslpóstvörn =

Svar

Af hverju eru trýni á hundum alltaf blaut?
Nef hunda er venjulega rakt. Á trýni hunda eru frumur sem seyta vökva (e. mucus) og þannig helst trýnið rakt og hundarnir viðhalda sínu gríðarlega næma þefskyni, en nefið er sjálfsagt það skynfæri sem hundar styðjast helst við.

Hundaeigendur kannast vel við að hundar sleiki á sér trýnið. Vökvinn sem frumurnar á trýninu seyta út fangar lyktarsameindir úr umhverfinu og þegar hundurinn sleikir nefið er hann að meta upplýsingarnar sem kunna að leynast í sameindunum. Auk þess halda hundar trýninu hreinu með því að sleikja það.

En trýni hunda getur verið rakt af ýmsum öðrum ástæðum. Það má segja að hundar svitni í gegnum trýnið og loppurnar. Trýnið leikur eitt af lykilhlutverkum í kælingu dýrsins á heitum degi.

Margir hafa heyrt að heitt og þurrt trýni þýði að hundurinn sé veikur - en það er ekki svo einfalt. Raka- og hitastig trýnisins getur sveiflast vegna veður- og umhverfisskilyrða og trýnið getur verið misrakt yfir daginn. Hundar geta einnig haft rakt trýni þótt þeir séu veikir.

Mynd:

• Max Pixel. (Sótt 14.3.2019).

Aðrir spyrjendur voru: Snorri Viðarsson, Rakel Anna, Sigrún Gyða Sveinsdóttir, Dagbjört Gísladóttir og Stefán Geir Snorrason.

...