Hver er saga sextugakerfis Babýloníumanna?

Nafn þitt

Netfang þitt

Netfang móttakanda

Ruslpóstvörn =

Svar

Hver er saga sextugakerfis Babýloníumanna?
Líklegt er að Babýlóníumenn hafi fengið sextugakerfi sitt í arf frá Súmerum. Lítið er vitað um Súmera en talið er að menning þeirra sé upprunnin í Mesópótamíu, þar sem nú er suðurhluti Íraks, um 4000 fyrir Krist. Viðtekin kenning gerir ráð fyrir að tveir eldri þjóðflokkar hafi runnið saman og myndað Súmera. Talnakerfi þjóðflokkanna tveggja var ólíkt, einn notaðist við grunntöluna fimm en hinn miðaði við tólf. Til að auðvelda verslun sín á milli þróuðu þjóðflokkarnir sameiginlegt kerfi með grunntöluna sextíu.

Uppruni talnakerfis með fimm sem grunntölu er næsta augljós, þar hafa fingurnir verið notaðir til talningar. Öllu flóknara er að skilja kerfi sem miðar við töluna tólf. Vísindamennirnir J.J. O'Connor og E.F. Robertson við St. Andrews-háskóla í Skotlandi skýra tilurð kerfisins á eftirfarandi hátt: notaðir eru hlutar fjögurra fingra á annarri hendi. Liðamótin í fingrunum, utan þumalfingurs, skipta hverjum fingri í þrjá hluta. Þannig fást fjórir fingur með þremur hlutum hver eða samtals tólf hlutum.

Súmerarnir hafa ef til vill talið upp að sextíu með því að nota aðferð líka þessari: notaðir eru allir fingur vinstri handar nema þumalfingur. Svo er hver fingur á hægri hendi notaður til að benda á hvern hinna tólf hluta vinstri fingranna eins og fyrr var skýrt. Þannig telur hver fingur hægri handar tólf hluti eða samtals sextíu.

Heimild og mynd:

• Þýtt og endursagt af wonderquest.com. (Sótt 22.08.2002).
• Babylonian numerals. (Sótt 22.08.2002).

...