Er hægt að sjá súrefni?

Nafn þitt

Netfang þitt

Netfang móttakanda

Ruslpóstvörn =

Svar

Er hægt að sjá súrefni?
Súrefni er tvíatóma sameind. Það er gert úr tveimur súrefnisfrumeindum og sameindaformúla þess er O₂. Orðið súrefni er þýðing á erlenda orðinu oxygen. Oxys þýðir 'súr' og gennan 'að mynda' sem vísar til þess að súrefni er efni sem myndar sýrur. Súrefni er einnig kallað ildi, dregið af orðinu eldur, en súrefni er skilyrði fyrir bruna.

Súrefni er í gasham fyrir ofan -183°C, í storkuham fyrir neðan -219°C og í vökvaham á milli þessara tveggja hitastiga. Í gasham er súrefni lit-, lyktar- og bragðlaust. Súrefni í gasham er því ósýnilegt eins og aðrar litlausar gastegundir. Þess vegna tökum við ekki beint eftir því að súrefni umlykur okkur á hverjum degi, en um 21% af lofthjúpi jarðar er súrefni.

Súrefni í vökva- og storkuham greinum við þó auðveldlega rétt eins og aðra fljótandi og frosna vökva. Fljótandi og frosið súrefni er fölblátt að lit eins og sjá má á myndinni hér fyrir ofan. Það fer því eftir ástandi súrefnis hvort við skynjum það með augunum.

Eðlismassi súrefnis í gasham (við 0°C og eina loftþyngd) er 1,429 g/l og á vökvaformi (við -183°C) 1141 g/l. Það eru því um 798 sinnum fleiri súrefnissameindir í einum lítra af fljótandi súrefni en í einum lítra af súrefni í gasham.

Heimildir og mynd:

• Wikipedia - Súrefni (Skoðað 18.10.2010).
• Saga frumefnanna - síða Þorsteins Sæmundssonar. (Skoðað 19.10.2010).
• Liquid oxygen in a beaker 4.jpg. (Sótt 6.9.2021).

Eftirfarandi spurningum var einnig svarað:

• Hvað er súrefni?
• Hver er eðlismassi fljótandi súrefnis? Hvað er 1 lítri af súrefni þungur?

...