Af hverju þurfum við að kunna að greina öll orð í orðflokka?

Nafn þitt

Netfang þitt

Netfang móttakanda

Ruslpóstvörn =

Svar

Af hverju þurfum við að kunna að greina öll orð í orðflokka?

Hér er jafnframt svarað spurningu Aldísar Ernu Pálsdóttur Af hverju þurfum við að læra kennimyndir sagna fyrst við eigum aldrei eftir að nota það í framtíðinni nema sem kennarar?

Börn læra málið án þess að vita nokkuð um hvað fallorð eru og hvað smáorð. Þau vita ekkert um mun á nafnorði og lýsingarorði, þótt þau læri snemma að nota slík orð rétt, og þau vita ekki af hverju þau nota orðin í ákveðinni röð og hver munurinn á einstökum orðum er. Menn geta alla ævi talað málið og komið vel fyrir sig orði án þess að geta greint í orðflokka.

En meginástæða þess að kenna fólki að greina í orðflokka er að með því móti öðlast það betri skilning á málinu og byggingu þess. Við höfum þá svör við því af hverju við tölum og skrifum eins og við gerum. Ef menn vita hvað sögn er, nafnorð, lýsingarorð, fornafn og svo framvegis eiga þeir auðveldara með að mynda setningar rétt og um leið að taka málið réttum tökum. Með því að þekkja forsetningar og hvaða falli þær stýra er minni hætta á að nota röng föll í setningum. Með því að læra um fornöfn vitum við hvenær við getum notað persónufornafn, hvenær ábendingarfornafn og hvenær afturbeygt fornafn svo dæmi séu nefnd. Gagnið, sem við höfum af þessu, er aukin þekking. Við skiljum og vitum hvernig málið er notað.

Þessi þekking gagnast okkur einnig við að læra erlend tungumál, sérstaklega mál sem ekki eru náskyld íslensku. Við erum þá fljótari að átta okkur á hvernig þau eru byggð og hvað greinir þau frá íslensku.

Því er enn við að bæta að þeir sem kunna skil á hugtökum málfræðinnar nota þau oft í umræðum sín á milli um tungumál, málfar, orðalag og fleira. Hugtökin hjálpa okkur að tjá öðrum skilning okkar á þessum atriðum og skiptast á skoðunum um þau.

...