Hvenær kom fyrsta bókin um Tinna út og hafa allar Tinnabækurnar komið út á íslensku?

Nafn þitt

Netfang þitt

Netfang móttakanda

Ruslpóstvörn =

Svar

Hvenær kom fyrsta bókin um Tinna út og hafa allar Tinnabækurnar komið út á íslensku?
Tinni er söguhetja í belgískum teiknimyndasögum eftir teiknarann Hergé. Fyrsta sagan um Tinna kom út árið 1929 og fjölmargar fylgdu í kjölfarið. Flestar sögurnar hafa komið út á íslensku. Nokkrir íslenskir karlar bera nafnið Tinni en það virðist sótt til söguhetjunnar.

Skapari Tinna var Belginn Georgés Remi (1907-1983) sem gekk undir höfundarnafninu Hergé. Nafnið er myndað með því að bera fram í öfugri röð upphafsstafi höfundarins á frönsku, það er RG.

Fyrstu teikningar Hergés birtust árið 1921 í skólablaði sem skátafélag höfundarins gaf út. Tveimur árum síðar sáust teikningar Hergés í almennu skátablaði belgískra skáta. Blaðið nefndist Le Boy-scout belge og kom út einu sinni í mánuði. Árið 1926 kom fyrsta teiknimyndasaga Hergés út í sama blaði. Í henni segir frá söguhetjunni Totor sem var eins konar fyrirrennari Tinna.

Fyrsta sagan um Tinna var framhaldssaga í barnablaðinu Le Petit Vingtième, sem fylgdi vikulega með dagblaðinu Le Vingtième Siècle. Fyrsti söguhlutinn birtist 10. janúar árið 1929 og sá síðasti 8. maí 1930. Sagan kom síðan út á bókarformi árið 1930 og nefndist á frummálinu Tintin au pays des Soviets. Hluti upplagsins eða 500 eintök, var gefinn út með áritun söguhetjunnar Tinna og hundsins Tobba. Hergé áritaði fyrir hönd Tinna en ritari á blaðinu Le Vingtième Siècle áritaði fyrir hönd Tobba. Sagan kom fyrst út á íslensku árið 2007 og nefndist Tinni í Sovétríkjunum.

Í bókinni segir af blaðamanninum Tinna sem starfar fyrir barnablaðið Le Petit Vingtième og er sendur til Sovétríkjanna til að greina ungum lesendum blaðsins frá ástandi mála þar. Samkvæmt sumum heimildum hafði Hergé fyrirhugað að fyrsta sagan um Tinna gerðist í Ameríku en samningur Hergés við belgíska prestinn og blaðamaðinn Norbert Wallez (1882-1952), ritstjóra Le Vingtième Siècle, kvað á um að fyrsta sagan gerðist í Sovétríkjunum. Áður en Hergé hófst handa við söguna fékk Wallez honum í hendur ritið Moscou sans voiles: Neuf ans de travail au pays des Soviets sem fyrrum ræðismaður Belga í Sovétríkjunum, Joseph Douillet, hafði skrifað og gefið út 1928. Þar er sett fram hörð gagnrýni á stjórnarfar í Sovétríkjunum og hugmyndafræði kommúnismans. Sum atriði úr riti Douillets voru tekin lítið breytt upp í framhaldssögunni um Tinna.

Eitt helsta einkenni Tinna er gulleitur hárbrúskur sem birtist strax í fyrstu sögunni. Í sögubyrjun er Tinni vel greiddur en á áttundu síðu stekkur hann upp í opinn bíl og brunar svo hratt af stað að hárið á honum ýfist. Eftir þessa bílferð hélst greiðsla Tinna óbreytt allar 24 bækurnar.

Tinni var mikill ferðalangur og kom meðal annars einu sinni til Íslands. Í bókinni Dularfulla stjarnan koma félagarnir Tinni, Tobbi og Kolbeinn við á Akureyri með skipinu Aurora til að sækja olíu og vistir fyrir rannsóknarleiðangur norður í Íshaf í leit að lofsteini. Kolbeinn kafteinn, sem var þá forseti Bindindissamtaka sjómanna, varð Bakkusi að bráð í heimsókninni til Akureyrar og háði margar glímur við Bakkus eftir það.

Eiginlega Tinnabækur eru 24 talsins. Af þeim hafa 23 verið þýddar á íslensku, aðeins seinasta bókin Tintin et l'Alph-Art er óþýdd. Hergé náði ekki að ljúka þeirri bók áður en hann lést í mars 1983 en hún var engu að síður gefin út eftir lát hans, ófullgerð.

Tinnabækurnar eru með vinsælustu evrópsku teiknimyndasögum sem gefnar hafa verið út. Þær hafa verið þýddar á yfir 70 tungumál og selst í meira en 230 milljónum eintaka.

Hér fylgir listi yfir eiginlegar Tinnabækur, listanum er raðað eftir útgáfuári þýðingar á íslensku og í aftasta dálki kemur fram hvenær sagan var fyrst gefin út á frummálinu á bókarformi.

Titill	Útgáfuár þýðingar	Frumútgáfa
Dularfulla stjarnan	1971	1942
Svaðilför í Surtsey	1971	1938
Eldflaugastöðin : ævintýri Tinna á tunglinu : fyrri hluti	1972	1953
Vindlar Faraos : ævintýri Tinna í Austurlöndum	1972	1934
Krabbinn með gylltu klærnar	1973	1941
Í myrkum Mánafjöllum : ævintýri Tinna á tunglinu	1973	1954
Sjö kraftmiklar kristallskúlur	1974	1948
Fangarnir í Sólhofinu	1974	1949
Tinni í Tíbet	1974	1960
Veldissproti Ottókars konungs	1974	1939
Leynivopnið	1975	1956
Kola-farmurinn	1975	1958
Skurðgoðið með skarð í eyra	1975	1937
Svarta gullið	1975	1950
Leyndardómur Einhyrningsins	1976	1943
Tinni í Kongó	1976	1931
Tinni í Ameríku	1976	1932
Flugrás 714 til Sydney	1976	1968
Vandræði ungfrú Vailu Veinólinó	1977	1963
Blái lótusinn	1977	1936
Tinni og Pikkarónarnir	1977	1976
Fjársjóður Rögnvaldar rauða	1977	1944
Tinni í Sovétríkjunum	2007	1930
Tintin et l'Alph-Art	óútgefin	1986

Heimildir:

• Tintin - Official web site. (Sótt 8.01.2016).
• Tintin | cartoon character | Britannica.com. (Sótt 8.01.2016).
• Herge | Belgian cartoonist | Britannica.com. (Sótt 8.01.2016).
• Tintin (character) - Wikipedia, the free encyclopedia. (Sótt 8.01.2016).
• Benoît Peeters, Hergé, son of Tintin (þýð. Tina A. Kover), John Hopkins University Press, Baltimore 2012.

Myndir:

• Cartoonist globale - ilSole24ORE. (Sótt 8.01.2016).
• Les Aventures de Tintin - Tintin. (Sótt 8.01.2016).
• Toute l'Islande propose des articles de fond sur la culture et l'Histoire islandaises. Vikings, mythologie nordique, eddas, sagas, polar islandais. Et bien sûr, la nature flamboyante et destructrice de l'Islande. En bonus, des interviews, des photos de l'Islande, des biographies et bien d'autres choses à découvrir.. (Sótt 10.01.2016).

Upprunalega spurningin var þessi:

Komu allar Tinnabækurnar út á íslensku og hver er útgáfuröð þeirra í Belgíu? Segið mér líka allt um Tinna.

Höfundur þakkar Sigurjóni Ólafssyni, stundakennara við HÍ, fyrir yfirlestur og fyrir að skrifa efnisgreinina um heimsókn Tinna til Akureyrar.

...