Aðrir nafngreindir menn eins og Hrafna-Flóki og Garðar Svavarsson komu hingað á undan Ingólfi en þeir hófu ekki búsetu hér. Í svari Gísla Gunnarssonar við spurningunni Hvers vegna hefur Náttfara ekki verið hampað sem fyrsta landnámsmanninum? kemur fram að þrællinn Náttfari var fyrstur til að hefja ævilanga búsetu á Íslandi. Þegar Landnámabók var rituð hefur ríkum bændum og höfðingjum ekki þótt við hæfi að marka upphaf landnáms norrænna höfðingja við undankomu þræls Garðars Svavarssonar. Síðan þá hefur það verið hefð að telja Ingólf Arnarson fyrsta landnámsmanninn. Um Papa á Íslandi er hægt að lesa í svari Axels Kristinssonar við spurningunni Eru til áþreifanlegar sannanir fyrir veru Papa á Íslandi fyrir landnám norrænna manna? Þar segir í lokaorðunum:
Engar áþreifanlegar sannanir eru fyrir veru Papa á Íslandi og full ástæða til að efast um að þeir hafi verið hér. Á hinn bóginn er heldur engin ástæða til að útiloka það.