Sólin
Rís 10:23 • sest 16:05
Tunglið
Rís 25:04 • Sest 15:29
Flóð
Árdegis: 12:18 • Síðdegis: 25:05
Fjara
Árdegis: 05:51 • Síðdegis: 18:50
Spyrjandi bætir því við að hann hafi lokið BA-gráðu í mannfræði með kynjafræði sem aukafag og sé að leita fyrir sér með meistaranám í kynjafræði í Bretlandi.MA og MSc eru tvær af þeim gráðum sem nemar í framhaldsnámi við enska háskóla geta útskrifast með. Þær eru sambærilegar, á sama stigi báðar tvær, á milli BA-gráðu og doktorsgráðu og oftast veittar eftir eins árs fullt framhaldsnám í háskóla, eða tveggja ára hlutanám. MA stendur fyrir Master of Arts, MSc fyrir Master of Science. Hvaða gráðu stúdentar útskrifast með, fer eftir því við hvaða háskóladeild (Faculty) þeir hafa stundað nám sitt. Fög eins og efnafræði og eðlisfræði eru undantekingarlítið, eða undantekningarlaust, innan raunvísindadeildar og nemar útskrifast því þaðan með MSc-gráðu. Fög eins og enska og bókmenntir eru alla jafnan innan hugvísindadeildar og nemar útskrifast því þaðan með MA-gráðu.
Birkbeck háskóli í London er meðal þeirra bresku skóla sem bjóða bæði upp á MA og MSc nám í kynjafræði.
Í öðrum tilvikum eru línur ekki eins skýrar. Þannig er það til dæmis í sumum af þeim skólum þar sem félagsleg og líffræðileg mannfræði eru kenndar innan sömu skorar (department), að boðið er upp á MA-nám í félagsmannfræði og MSc-nám í líffræðilegri mannfræði og framhaldsnemar útskrifast ýmist með MA- eða MSc-gráðu eftir því hvora leiðina þeir velja. Engin ákveðin regla virðist ráða hvar nýleg fög, eins og kynjafræði, lenda og stundum ekki annað að sjá en þar ráði saga, hefðir og innri pólitík viðkomandi stofnanna. Málið flækist svo enn frekar með því að margir breskir háskólar virðast hafa tekið þá stefnu að leiða sjálfa sig í gegnum endalausar skipulagsbreytingar, þar sem deildir verða skólar (Schools) og skólar verða stofnanir og stofnanir verða deildir (einhverjir munu víst hafa starfa af skipulagsbreytingum þessum). Nú getur maður ímyndað sér að MSc-nám byggi kannski meira á raunvísindalegum fræðum og aðferðum, en MA-námið. Það er þó engan veginn öruggt og gott ráð að kanna ítarlega uppbyggingu námsins í hverju tilviki, hvernig námsmati er háttað, hvaða námskeið boðið er upp á, hver eru skyldunámskeið og svo framvegis. Um að gera er að hafa samband við þær deildir sem spyrjanda/lesanda líst á og spyrja í þaula. Breskir háskólar geta haft talsverðar tekjur af framhaldsnemum frá löndum eins og Íslandi og taka þeim því yfirleitt fagnandi. Mynd: guardian.co.uk. Sótt 30. 10. 2008.
Hér fylgja hlekkir sem spyrjandi sendi okkur á skóla sem bjóða upp á mismunandi gráður fyrir meistaranám í kynjafræði:
