Sólin
Rís 10:17 • sest 16:10
Tunglið
Rís 21:40 • Sest 15:54
Flóð
Árdegis: 10:12 • Síðdegis: 22:46
Fjara
Árdegis: 03:46 • Síðdegis: 16:36
Áður en lengra er haldið má benda á að gott er að lesa svar sama höfundar við spurningunni Hvað er DNA og RNA og hvert er hlutverk þeirra? Umritun á við það þegar erfðaefnið (DNA) er notað sem mót við nýmyndun RNA sameinda. DNA keðja gens er tvíþátta og við umritun er tekið RNA umrit af öðrum þættinum. Þannig eru öll gen umrituð og þannig mynda frumur allt sitt RNA. Flestar RNA sameindirnar eru síðan notaðar sem mót við röðun amínósýra í peptíðkeðjur prótína. Orðið afritun hefur stundum verið notað um það ferli sem oftar er nefnt eftirmyndun. Þá er átt við þá nýmyndun DNA sameinda sem fer fram í hverri frumukynslóð. Orðið afritun er gott og gilt orð en það er keimlíkt orðinu umritun og mönnum hættir til að rugla þeim saman. Hafa verður í huga að DNA og RNA eru líkar sameindir og það er ekki óeðlilegt þótt sagt sé að við umritun sé tekið RNA afrit af DNA sameindum eða að þær séu afritaðar sem RNA. En þá er verið að nota orðið afritun um umritunina! Til þess að forðast allan misskilning er því heppilegra að nota orðið eftirmyndun um nýmyndun DNA sameinda.
