Sólin
Rís 10:26 • sest 16:02
Tunglið
Rís 01:04 • Sest 15:19
Flóð
Árdegis: 01:05 • Síðdegis: 13:31
Fjara
Árdegis: 07:12 • Síðdegis: 20:04
Hér er einnig svarað skyldum spurningum frá sama spyrjanda: Hvað eiga froskar mörg afkvæmi? Hvar og á hverju lifa þeir? Í hvaða bókum er eitthvað um froska? Hvað verða froskar stórir?Froskar, ásamt körtum, tilheyra ættbálknum Anura. Mynd hér að neðan sýnir flokkunarfræðilegan skyldleika froskdýra.
Innan ættbálksins Anura hafa fundist 3.483 tegundir en hér á Íslandi lifir engin tegund úr þessum ættbálki villt.
Stærsta tegund froska er Golíatfroskurinn (Conraua goliath) í Vestur-Afríku sem verður 30 cm á lengd. Hins vegar er brasilíska tegundin Psyllophryne didactyla sú minnsta eða 9,8 mm á lengd. Algengasta fæða froska er skordýr, aðrar liðfætlur og ormar en nokkrar tegundir éta aðra froska, nagdýr og skriðdýr. Mjög breytilegt er milli tegunda hversu mörgum eggjum froskar verpa. Norður-ameríski bolafroskurinn (Rana catesbeiana) er talinn framleiða mest af eggjum eða allt að 10.000 egg. Egg þessarar tegundar fljóta á vatni eins og nokkurs konar filma. Svona tilhögun er mjög hentug því bæði haldast eggin rök og um leið leikur nægjanlegt súrefni um þau. Þessi aðferð er algeng meðal trjáfroska í hitabeltishluta Ameríku, sérstaklega froska af ættinni Hylidae. Algengast er að froskar verpi fáeinum þúsundum eggja. Fæst eru eggin um 200 hjá nokkrum tegundum sem verpa eggjum í straumvötn upp til fjalla. Tegundir innan ættkvíslarinnar Nectophrynoides eru þær einu innan ættbálksins sem verpa ekki eggjum heldur fæða unga. Froskar eru útbreiddir um allan heim en flestar tegundir eru á regnskógarsvæðunum og er Amason-svæðið einstaklega tegundaauðugt. Tegundum fer síðan fækkandi eftir því sem lengra er farið frá þessum svæðum. Sem dæmi um tegundafjölda má nefna að á einu svæði í Ecuador, við ein upptök Amason stórfljótsins, eru 84 tegundir froska. Það er sami fjöldi og finnst í öllum Bandaríkjunum. Tegundum fer einnig fækkandi með aukinni hæð en þó er hægt að rekast á tegundir í Suður-Ameríku í 4.500 metra hæð. Nokkrar tegundir froska lifa norðan við heimskautsbaug, í Kanada, Alaska og Síberíu. Allar eru þær af ættkvíslinni Rana. Froska er að finna í öllum heimsálfunum nema á Suðurskautslandinu. Lítið er um bækur í íslenskum bókabúðum sem fjalla einvörðungu um froska en hægt er að benda á bókasöfn Náttúrufræðistofnunar og Líffræðistofnunar. Einnig má benda á netbókabúðir, til dæmis amazon.com sem selja fjölmarga titla um allt sem snýr að froskum.
