Hvað er tölva?

Nafn þitt

Netfang þitt

Netfang móttakanda

Ruslpóstvörn =

Svar

Hvað er tölva?
Einföld skilgreining á hugtakinu tölva er á þá leið að tölvur séu forritanleg tæki. Vandamál við þá skilgreiningu er að mjög mörg tæki í dag eru forritanleg. Til að mynda er hægt að forrita þvottavélar upp að vissu marki en fæstir halda því líklega fram að þvottavélarnar þeirra séu tölvur. Með tölvum þarf að vera hægt að leysa margvísleg verkefni, ekki bara að þvo þvott!

Lykillinn að hugtakinu tölva er þá líklega sá eiginleiki að með tölvum er hægt að leysa mjög ólík verkefni á sveigjanlegan hátt. Nútímatölvu er hægt að forrita til að leysa jafn ólík verk og að stjórna umferðarljósum, reikna út besta vaktafyrirkomulag á sjúkrahúsi og að spila flókinn grafískan tölvuleik.

Ef við lítum á einstaka hluta tölvu, þá þarf að vera leið til að koma inntaki, bæði skipunum og gögnum, inn í hana. Ýmis tækni er notuð til þess, lyklaborð, mús, stýripinnar, nemar í götu fyrir umferðarljós, strikamerkjalesarar í stórmörkuðum, og svo mætti lengi telja. Það þarf einnig að vera leið til að koma upplýsingum/niðurstöðum á framfæri við notandann. Það er oftast gert með tölvuskjám, en einnig er hægt að gera það með einföldum ljósum, hljóði eða með einhverri aðgerð, til dæmis hreyfingu á vélmenni.

Tölva þarf að vera forritanleg, þannig að það þarf að vera hægt að „segja henni hvað hún á að gera“ á einhvern fyrirfram ákveðinn hátt. Tölvur hafa nokkur mismunandi lög af skipunum. Örgjörvar (e. CPU) tölvanna hafa tilteknar skipanir innbyggðar. Þær eru kódaðar sem tölur, þannig að til dæmis talan 45 tekin sem skipun gæti þýtt að leggja eigi saman næstu tvö gildi. Innbyggðu skipanirnar í örgjörvunum er mjög frumstæðar og það er ekki þægilegt að nota þær, því þær eru mjög mismunandi milli örgjörva frá mismunandi framleiðendum.

Flestar tölvur eru því forritaðar með svokölluðum æðri forritunarmálum. Þetta eru mál eins og C++, Java, Pascal, Fortran og fleiri. Skipanir í þessum forritunarmálum eru staðlaðar milli tölva og eru á mun hærra plani en innbyggðu skipanirnar í örgjörvunum. Í þessum forritunarmálum eru síðan skrifuð forrit sem notendur tölvanna nota, til dæmis ritvinnslukerfi, töflureiknar og stýrikerfi. Þessi notendaforrit hafa sínar eigin skipanir sem notandinn gefur til að láta tölvuna gera tiltekinn hlut, til dæmis feitletra valinn texta, eyða skrá eða taka við inntaki í reikniforrit.

Frekara lesefni af Vísindavefnum:

• Ef heilinn væri tölva hveru mörg gígabæti væri hann þá? eftir JGÞ
• Er jafnrétt að nota orðið tölva og talva? eftir Guðrúnu Kvaran
• Er það rétt að afkastageta tölva aukist þegar innra minni er stækkað? eftir Bergþór Jónsson
• Eru einhver takmörk fyrir því hvað tölva getur orðið hröð? eftir Hjálmtý Hafstensson

Mynd: Old Computer. Myndin er fengin af Wikimedia Commons og birt undir leyfinu Creative Commons Attribution-ShareAlike 4.0 International (CC BY-SA 4.0.) (Sótt 8. júlí 2021.)...