Hver var Leó Kristjánsson og hvert var framlag hans til bergsegulmælinga?

Nafn þitt

Netfang þitt

Netfang móttakanda

Ruslpóstvörn =

Svar

Hver var Leó Kristjánsson og hvert var framlag hans til bergsegulmælinga?
Leó Kristjánsson (1943-2020) var jarðeðlisfræðingur. Hann stundaði um áratuga skeið bergsegulmælingar á Íslandi og túlkun þeirra, bæði í jarðfræðilegu augnamiði og með tilliti til þess hvernig jarðsegulsviðið hefur breyst í tímans rás. Þegar fljótandi bergkvika storknar varðveita örsmáar járnagnir í berginu segulstefnu jarðsegulsviðsins á þeim tíma. Með því að kanna segulstefnu bergsins í jarðlögum á Íslandi frá ólíkum tímum má reikna hreyfingu segulpólanna síðastliðin 15 milljón ár. Jarðlög á Íslandi geyma þannig merkilegar upplýsingar um það hvernig kjarni jarðarinnar hegðar sér.

Á síðari árum kannaði Leó sögu rannsókna á íslenskum steindum og bergtegundum erlendis, einkum hvað varðaði íslenskt silfurberg og notkun þess í vísindatæki. Mælingar á íslenskum silfurbergskristöllum og mælingar með tækjum sem nýttu slíka kristalla höfðu mikil áhrif á framþróun vísinda í Evrópu á 18. og 19. öld. Rannsóknir Leós gáfu ítarlega mynd af þessum áhrifum, sem hann nefndi merkasta framlag Íslands til umheimsins.

Leó var höfundur eða meðhöfundur um 90 vísindagreina í ritrýndum tímaritum á alþjóðavettvangi auk fjölmargra erinda á ráðstefnum, alþýðlegra greina, ritdóma, ritskráa, greina um kennslumál og fleira. Fjöldi meðhöfunda var alls um 100, frá 10 löndum. Leó var heiðursfélagi í American Geophysical Union (AGU), alþjóðlegum samtökum jarðeðlisfræðinga sem telja yfir 60.000 félagsmenn frá 137 löndum.

Leó fæddist á Ísafirði árið 1943, hann lauk stúdentsprófi úr stærðfræðideild Menntaskólans á Akureyri 1962, B.Sc. Honours-gráðu í eðlisfræði frá Edinborgarháskóla 1966, M.Sc.-gráðu í jarðeðlisfræði frá Háskólanum í Newcastle upon Tyne 1967 og Ph.D.-gráðu frá Memorial-háskóla í St. John's, Kanada 1973. Doktorsritgerð hans fjallaði um bergsegulmælingar á tertíer-gosbergi frá Vestur-Grænlandi, Baffinlandi og Íslandi.

Myndir:

• Toril Johannessen. (Sótt 11.12.2017).
• File:Estonian Museum of Natural History Specimen No 182279 photo (g28 g28-218 1 jpg).jpg - Wikimedia Commons. (Sótt 9.07.2024). Myndin kemur frá Estonian Museum of Natural History og er birt undir leyfinu CC BY-SA 4.0 Deed.

...