Hver eru 5 stærstu eldfjöll í heimi?

Svar

Ekki er alveg ljóst hvort átt er við hæð eða rúmmál þegar spurt er um stærsta eldfjall í heimi, eða jafnvel hvaða eldfjöll gjósa mest, en hér er gengið út frá því að átt sé við hæðina.

Hæstu eldfjöll í heimi eru öll í Andesfjallgarðinum í Suður-Ameríku. Andesfjöllin eru dæmi um fellingafjöll sem myndast hafa þar sem hafsbotnsskorpa sekkur undir meginlandsskorpu eins og lesa má í svari Sigurðar Steinþórssonar við spurningunni: Hvernig myndast fellingafjöll?

Listinn yfir fimm hæstu eldfjöll heims er eftirfarandi:

Eldfjall	Land	Hæð yfir sjávarmáli (m)
Nevados Ojos del Salado	Síle/Argentína	6887
Llullaillaco	Síle/Argentína	6739
Tipas	Argentína	6660
Nevado de Incahuasi	Síle/Argentína	6621
Nevado del Sajama	Bólivía	6542

Llullaillaco, næsthæsta eldfjall í heimi.
Af þessum eldfjöllum eru aðeins til ritaðar heimildir um gos í Llullaillaco en þar gaus síðast árið 1877. Þó ekki séu skrásettar heimildir um gos í Nevados Ojos del Salado er talið að það hafi gosið síðast fyrir um 1000-1500 árum. Talið er að hin fjöllin á listanum hafi gosið á nútíma (holocene), það er á síðustu 10.000 árum.

Nánar er fjallað um þetta í svari sama höfundar við spurningunni: Hvert er stærsta eldfjall í heimi?

Á Vísindavefnum eru fleiri svör um eldfjöll, til dæmis:

• Hvað eru til mörg eldfjöll? eftir EDS
• Hvaða eldfjall hefur gosið oftast í heiminum? eftir Ulriku Andersson
• Hvaða eldfjall hefur gosið mest? eftir Sigurð Steinþórsson
• Af hverju eru sum eldfjöll á Íslandi virk en önnur ekki? eftir Ármann Höskuldsson
• Hvers vegna koma eldgos? eftir ÍDÞ

Heimild:

• Global Volcanism Program

Mynd:

• Wikipedia - Llullaillaco. Sótt 16.6.2011

---

Þetta svar er í flokknum „bekkirnir spyrja“ þar sem starfsfólk vefsins svarar spurningum frá grunnskólabekk í kennslustund, samkvæmt samningi. Lögð er áhersla á skjót svör, stutt og aðgengileg. Oft er byggt á öðrum svörum sem kunna að nýtast almennum lesendum betur.