Í hvað detta menn þegar þeir "detta í það"?

Svar

Sambandið að detta í það er ekki gamalt í málinu um að neyta áfengis ríkulega oftast samfara einhverri skemmtun en þó ekki alltaf. Margur dettur í það einn með sjálfum sér.

Elstu dæmi Orðabókar Háskólans eru frá síðari hluta 20. aldar en sambandið getur vel verið eitthvað eldra. Í Íslenskri orðabók (2002: 213) er það sagt notað í óformlegu máli en með því er átt við ,,orðfæri sem einkum er notað við óformlegar aðstæður vegna merkingar, félagslegra blæbrigða eða uppruna“ (xiv).

Hugsunin að baki er líklegast sú að sá sem dettur í það (það er áfengið) fari á kaf í eins konar áfengisámu og neyti því ef til vill helst til mikið af drykknum áður en hann nær sér upp úr aftur.

Mynd:

• The Travel Tart. Sótt 4.1.2010.

Spurningin í heild sinni hljóðaði svona:

Sæll vefur.
Mig hefur dauðlangað lengi til að vita hvað það er sem maður dettur eða "hrynur í"? Er þetta eitthvað málatiltæki eða bara svona "old saying"?