Hvað er aflatoxín og hefur það einkennandi bragð ef það finnst í matvælum?

Nafn þitt

Netfang þitt

Netfang móttakanda

Ruslpóstvörn =

Svar

Hvað er aflatoxín og hefur það einkennandi bragð ef það finnst í matvælum?
Aflatoxín er sveppaeitur (e. mycotoxin). Það er eitt þekktasta og mest rannsakaða sveppaeitrið sem vitað er um í dag. Eitrið er framleitt af myglusveppunum Aspergillus flavus, A. nomius og A. parasiticus. Þessir myglusveppir vaxa við ákveðið hita- og rakastig í matvælum og fóðri. Aflatoxín finnst meðal annars í kornvörum, hnetum og fíkjum. Auk þessa hefur aflatoxín fundist í mjólk þeirra dýra sem hafa neytt mengaðs fóðurs.

Til eru nokkrar tegundir aflatoxína en þær eru B1, B2, G1 og G2. Þessar tegundir finnast í mismiklu magni og eru miseitraðar en af þeim er aflatoxín B1 eitraðast og finnst jafnframt í mestu magni. Rannsóknir hafa sýnt að aflatoxín getur verið banvænt í háum skömmtum. Auk þessa hafa rannsóknir á tilraunadýrum sýnt fram á að aflatoxín geti verið krabbameinsvaldandi. Í tilraunarottum er þetta til dæmis eitt mest krabbameinsvaldandi efni sem þekkt er.

Áhrif aflatoxíns á menn eru ekki að fullu þekkt. Ýmsar rannsóknir hafa gefið til kynna að aflatoxín geti haft áhrif á myndun krabbameins í lifur hjá mönnum.

Aflatoxín er hættulegt í mjög litlum styrk og þess vegna er ólíklegt að magnið sé nógu mikið til að það gefi af sér ákveðið bragð. Hins vegar sést oft grænn litur vegna myglusveppsins sem framleiðir eiturefnið.

Heimildir:

• Matvælastofnun | Sveppaeitur. (Skoðað 10.04.2014).

Við gerð þessa svars var einnig stuðst við svar eftir Björn Sigurð Gunnarsson, matvæla- og næringarfræðing: Getur verið hollt að borða myglaðan mat?

Kristínu Ólafsdóttur, sérfræðingi í eiturefnafræði, er þökkuð aðstoð við gerð þessa svars.

Mynd:

• Aspergillus - Wikipedia, the free encyclopedia. (Sótt 10.04.2014).

...