Hvað eru vébönd?

Svar

Nafnorðið vé hefur fleiri en eina merkingu. Það var notað í eldra máli um bústað, heiðinn helgistað, helgidóm og í skáldamáli um gunnfána, stríðsfána. Með orðinu vébönd er átt við bönd kringum helgan stað þar sem dómari átti sitt sæti og réttur var haldinn. Í Egils sögu er véböndum á Gulaþingi í Noregi lýst þannig (57. kafli):

En þar er dómurinn var settur var völlur sléttur og settar niður heslistengur í völlinn í hring en lögð um utan snæri umhverfis. Voru það kölluð vébönd.

Í yngra máli er til dæmis talað um að knattspyrnulið hafi svo og svo margan innan sinna vébanda.

Í yngra máli er orðið notað um mörk eða markalínur. Talað er til dæmis um að félög hafi svo og svo margan innan sinna vébanda, það er á félagaskrá eða stuðningsmannaskrá. Í ritmálssafni Orðabókar Háskólans eru dæmi um nokkur afbrigði, til dæmis fara út fyrir vébönd, halda sig fyrir innan vébönd og standa fyrir utan vébönd.

Mynd:

• Association football - Wikipedia, the free encyclopedia. (Sótt 26.6.2012).