Af hverju er gull svo verðmætt?

Svar

Upphaflega ástæðan til þess að gull varð verðmætt er sú að það er sjaldgæft í náttúrunni, en þó ekki sjaldgæfara en svo að menn vissu að það var til. Menn hafa einnig tekið snemma eftir því að það fellur ekki á þennan málm; hann breytist afar hægt með tímanum við venjulegar aðstæður, en járn ryðgar, spanskgræna fellur á kopar og það fellur á silfur, svo að við nefnum nokkra þá málma sem menn þekktu best í öndverðu.

Inngangur að neðanjarðargullnámu í Ástralíu.
Ástæður þess að fólk vill eignast gull eru annars margvíslegar. Fyrir það fyrsta þykir mörgum það fallegt og því er það notað í alls konar skrautmuni og skartgripi. Einnig getur fólki fundist það merki um hærri samfélagslega stöðu þess sem á gullið eða ber það.

Gull er líka nytsamlegt til margra hluta og er til að mynda notað í ýmis tæki, svo sem vélbúnað tölva. Gull hefur líka löngum verið notað í mynt og var algengt að gjaldmiðlar hvíldu á svokölluðum gullfæti, eins og lesa má um í svari Gylfa Magnússonar við spurningunni Hvað er gullfótur og hverjir eru kostir hans og gallar?

Frekara lesefni á Vísindavefnum:

• Er hreint gull (24 karöt) notað í eitthvað? eftir Ulriku Andersson
• Hvert er bræðslumark gulls? eftir Elínu Elísabetu Einarsdóttur og Nökkva G. Gylfason
• Hvað kostar gull? eftir Gylfa Magnússon
• Hvað leysir upp gull og platínu? eftir EÖÞ
• Hvað er glópagull og hvernig verður það til? eftir Sigurð Steinþórsson

Heimild:

• Gold. Wikipedia: The Free Encyclopedia.

Mynd:

• Wikipedia.com. Sótt 22.10.2010.

---

Þetta svar er í flokknum „bekkirnir spyrja“ þar sem starfsfólk vefsins svarar spurningum frá grunnskólabekk í kennslustund, samkvæmt samningi. Lögð er áhersla á skjót svör, stutt og aðgengileg. Oft er byggt á öðrum svörum sem kunna að nýtast almennum lesendum betur.