Er eitthvað alvörufjall í Hollandi og hvað er mikið af landinu undir sjávarmáli?

Svar

Fjöll eru ekki það fyrsta sem kemur upp í huga flestra þegar Holland er til umræðu, enda er landið afar láglent og flatt. Í raun er um 25% landsvæðis í Hollandi undir sjávarmáli og um helmingur landsins er undir einum metra yfir sjávarmáli. Landið er þó ekki alveg marflatt, í suður- og austurhluta þess rís land aðeins hærra. Það er þó ekki nema allra syðst í Hollandi sem hægt er að tala um alvöruhæðir og -hóla og jafnvel fjöll á þeirra mælikvarða.

Hæsti punktur Hollands kallast Vaalserberg og er í 322 m hæð yfir sjó. Hæð þessi eða fjall er í Limburg-héraði syðst í landinu. Staðurinn gengur líka undir heitinu "Drielandenpunt" í Hollandi þar sem þrjú lönd koma þar saman, Holland, Þýskaland og Belgía.

Vaalserberg, hæsti staður í Hollandi, 322 m yfir sjávarmáli.

Þess má til gamans geta að Vaalserberg er ekki hæsti staðurinn í Konungsríkinu Hollandi. Í Karíbahafi eru nokkrar eyjur, gamlar nýlendur Hollendinga, sem eru hluti af Konungsríkinu Hollandi. Þar er að finna hæsta punkt ríkisins, eldfjallið Mount Scenery á eyjunni Saba sem er ýmist sagt 862 eða 877 metrar yfir sjávarmáli (misjafnt eftir heimildum). Talið er að síðast hafi gosið í þessu fjalli um eða fyrir árið 1640.

Heimildir og mynd:

• Holland, landið og náttúra á Ferðaheimur.
• Geography of the Netherlands á en.wikipedia.org.
• Mount Scenery á en.wikipedia.org.
• The World Factbook
• Mynd: Vaalserberg á en.wikipedia.org. Höfundur myndar: David Edgar. Birt undir GNU Free Documentation License, version 1.2 og Creative Commons Attribution-Share Alike 3.0 Unported-leyfi.